धुरन्धर २: छ दिनमा ६०० करोड नजिक

मुम्बई । बलिउड अभिनेता रणवीर सिंह र राष्ट्रिय पुरस्कार विजेता निर्देशक आदित्य धरको सहकार्यले भारतीय बक्स अफिसमा सुनामी ल्याएको छ । उनीहरूको बहुप्रतिक्षित एक्सन–थ्रिलर फिल्म ‘धुरन्धर २ः द रिभेन्ज’ ले प्रदर्शनको सुरुवाती पाँच दिनमै भारतीय सिनेमाका कयौं पुराना रेकर्डहरू ध्वस्त पार्दै नयाँ इतिहास कायम गरेको छ ।
उच्च स्तरीय जासुसी कथामा आधारित यस फिल्ममा रणवीर सिंहले एक भारतीय जासुसको भूमिका निर्वाह गरेका छन् । फिल्ममा उनले पाकिस्तानमा बसेर भारतका लागि अत्यन्तै संवेदनशील र महŒवपूर्ण सूचनाहरू पठाउने चुनौतीपूर्ण काम गर्छन् । देशभक्ति र एक्सनले भरिएको फिल्मको सशक्त पटकथा र रणवीरको करिअरकै उत्कृष्ट मानिएको अभिनयले दर्शकलाई हलसम्म तान्न सफल भएको छ ।
बक्स अफिसमा रेकर्डको वर्षा
‘धुरन्धर २’ ले व्यापारको मामिलामा बलिउडको ११३ वर्ष लामो इतिहासका सबै कीर्तिमानलाई ध्वस्त पारेको छ । यो फिल्म सबैभन्दा तीव्र गतिमा ५०० करोड क्लबमा प्रवेश गर्ने पहिलो हिन्दी फिल्म बनेको छ भने छैटौं दिनमा यसको व्यापार ५७५ करोड भारु छोएको छ । संसारभर भने यसले ९ सय २० करोड भारु कमाएको छ ।

फिल्मको व्यापारिक यात्रा यसप्रकार रहेको छः
पहिलो दिनः १०२ करोड रुपैयाँ (विशाल ओपनिङ)
दोस्रो दिनः झण्डै ८० करोड रुपैयाँ
तेस्रो दिनः ११३ करोड रुपैयाँ
चौथो दिनः ११४.८५ करोड रुपैयाँ
पाँचौं दिन (सोमबार):६५ करोड रुपैयाँ

यसबाहेक फिल्मले प्रदर्शन हुनुअघि नै ‘पेड प्रिभ्यु’ बाट मात्रै ४३ करोड रुपैयाँ संकलन गरेर बलियो सुरुवातको संकेत दिएको थियो । पाँचौं दिनको कमाइसँगै फिल्मले भारतमा मात्रै ५०० करोडको नेट कलेक्सन पूरा गरेको छ ।
विश्व–बजारमा पनि ‘धुरन्धर’
भारतमा मात्र नभई अन्तर्राष्ट्रिय बजारमा पनि फिल्मको जादु उत्तिकै चलेको छ । अमेरिका, यूके, अष्ट्रेलिया र खाडी मुलुकहरूमा फिल्मले उत्साहजनक व्यापार गरिरहेको छ । ट्रेड एनालिस्टका अनुसार पाँच दिनभित्रै फिल्मको ‘वल्र्डवाइड ग्रस कलेक्सन’ ७५० देखि ८०० करोड रुपैयाँको बिचमा पुगिसकेको छ । छैटौं दिन आइपुग्दा यसले ९ सय १५ करोडको व्यापार गरेको हो । यो व्यापारसँगै यो फिल्म रणवीर सिंहको करियरकै सबैभन्दा ठूलो हिट साबित भएको छ भने निर्देशक आदित्य धरले आफ्नै अघिल्लो फिल्मको रेकर्डसमेत उछिनेका छन् ।
निर्देशक आदित्य धरको चुस्त निर्देशन रहेको यस फिल्ममा रणवीर सिंहका साथै सञ्जय दत्त, अर्जुन रामपाल, आर माधवन र राकेश बेदी जस्ता दिग्गज कलाकारहरूको प्रभावशाली अभिनय रहेको छ । कलाकारहरूको यो बलियो टोलीले फिल्मलाई थप उचाइ दिएको छ ।
यसअघि सार्वजनिक भएको ‘धुरन्धर’ को पहिलो भागले संसारभरबाट करिब १३ सय करोडको व्यापार गरेको थियो भने देशभित्र ८९५ करोड कमाएको थियो । ‘धुरन्धर २’ ले प्रदर्शनको पहिलो हप्तामै देखाएको यो आक्रामक रफ्तारले फिल्म सहजै १००० करोड क्लबमा सामेल हुने र अघिल्लो भागको रेकर्डसमेत तोड्ने निश्चित देखिएको छ ।
यसअघि सबैभन्दा चाँडो पाँच सय करोड कमाउने फिल्महरूको सूचीमा बाहुबली २ः द कन्क्लुजन, गदर २, पठान, एनिमल, स्त्री २ र पुष्पा २ थिए । यी फिल्मले यसअघि कहिल्यै नकमाएको पाँच सय करोड भारुको मानक बनाएर फिल्म पण्डितहरूलाई चकित पारेका थिए ।