‘तेल भिसा’का कार्की पक्राउ

काठमाडौं । चलचित्र ‘तेल भिसा’का निर्माता तथा वैदेशिक रोजगार व्यवसायी शिवराज कार्कीलाई प्रहरीले पक्राउ गरेको छ । काठमाडौं उपत्यका अपराध अनुसन्धान कार्यालयको टोलीले मंगलबार उनलाई स्वयम्भू क्षेत्रबाट नियन्त्रणमा लिएको हो । कार्कीमाथि करोडौं ठगी र वैदेशिक रोजगारसम्बन्धी गम्भीर कसुरको आरोप लागेको छ ।
लामो समयदेखि फरार रहेका कार्कीविरुद्ध गत भदौ ४ गते नै वैदेशिक रोजगार न्यायाधिकरणबाट पक्राउ पुर्जी जारी भएको थियो । प्रहरीका अनुसार, कानूनी कारबाहीबाट बच्न उनी भारत पुगेर त्यहाँ रेस्टुरेन्ट सञ्चालन गरी लुकिछिपी बस्दै आएका थिए । हालै नेपाल फर्किएको सूचना पाएलगत्तै प्रहरीले उनलाई पछ्याएर पक्राउ गर्न सफल भएको हो ।
सयौं युवा पीडित, करोडौंको ठगी
प्रारम्भिक अनुसन्धानका अनुसार कार्कीले अमेरिकासहित विभिन्न आकर्षक मुलुक पठाइदिने प्रलोभन देखाएर प्रतिव्यक्ति १ लाखदेखि २० लाख रुपैयाँसम्म असुल गरेका थिए । उनले काठमाडौंको चाबहिलमा ‘पी एण्ड एम इनोभेटिभ सर्भिसेज’ नामक भिसा कन्सल्टेन्सी सञ्चालन गरेर त्यसकै आडमा ठगी धन्दा चलाएको खुल्न आएको छ ।
प्रहरीले दिएको जानकारीअनुसार कार्कीले झण्डै २०० देखि २५० जना युवाहरूलाई वैदेशिक रोजगारीको झुटा आश्वासन दिएर ठगी गरेका छन् । हालसम्म १०० जनाभन्दा बढी पीडितहरूले उनीविरुद्ध उजुरी लिएर प्रहरीको सम्पर्कमा आइसकेका छन् । उनीविरुद्ध यसअघि प्रहरी वृत्त लैनचौरमा बैंकिङ कसुरसम्बन्धी मुद्दासमेत दर्ता भएको थियो ।
विवादमा ‘तेल भिसा’ टोली
शिवराज कार्की चलचित्र निर्माता संघका साधारण सदस्यसमेत हुन् । उनले ‘तेल भिसा’भन्दा अगाडि ‘चि मुसी चि’ नामक फिल्म निर्माण गरेका थिए । ‘तेल भिसा’ प्रदर्शनको तयारीमा रहँदा यसका निर्देशक शंकर घिमिरे र अभिनेत्री ऋचा घिमिरेमाथि पनि ठगीकै आरोप लागेको थियो । अमेरिका लैजाने भन्दै रकम असुल गरेर अलपत्र पारेको भन्दै उनीहरूविरुद्ध जिल्ला प्रहरी परिसर काठमाडौंमा उजुरी परेको थियो ।
सञ्जालमा मिश्रित प्रतिक्रिया
कार्की पक्राउ परेपछि सामाजिक सञ्जालमा पीडित र उनका निकटका व्यक्तिहरूले फरक–फरक प्रतिक्रिया दिएका छन् । मन्जु धमला नामकी एक पीडितले आफ्नो साढे दुई लाख रुपैयाँ फिर्ता माग गर्दै आक्रोश पोखेकी छिन् । उनले लेखेकी छिन्, ‘गरिबका छोराछोरीलाई कमजोर नठान्नुस्, मेरो पैसा फिर्ता दिनुस् । अरूको पैसामा रमाउन लाज लाग्दैन ?’
अर्कातर्फ, उनका मित्र जगदीश थापाले भने कार्कीको बचाउ गर्दै उनले आफैं ठगी नगरेको दाबी गरेका छन् । थापाका अनुसार कार्कीको नाम प्रयोग गरेर अरू कसैले पैसा उठाएको हुन सक्ने भएकाले यसको निष्पक्ष छानबिन हुनुपर्ने माग उनले गरेका छन् ।
प्रहरीले अहिले कार्कीमाथि थप अनुसन्धान अगाडि बढाएको छ र पीडितहरूको संख्या अझै बढ्न सक्ने अनुमान गरिएको छ ।