एमाले सांसदहरुलाई ओलीले भने– ‘उच्च मनोबलका साथ अगाडि बढ्नुस्’

काठमाडौं । एमाले सत्यको पक्षमा रहेको भन्दै अध्यक्ष केपी शर्मा ओलीले हतास नहुन पार्टी पंक्तिलाई आग्रह गरेका छन् । ललितपुरको च्यासलस्थित पार्टी केन्द्रीय कार्यालयमा बिहीबार नवनिर्वाचित सांसदहरूलाई सम्बोधन गर्दै उनले  मनोबल गिराउनुपर्ने कारण नभएको बताए । सिंहदरबारमा सपथपछि एमालेका सांसदहरु पार्टी केन्द्रीय  कार्यालय च्यासल पुगेका थिए । 
यसपटक संसद्मा एमालेका सांसद् २५ जनामात्रै छन् । प्रत्यक्षमा ९ सीट जितेको पार्टीले समानुपातिकमा १६ प्रतिनिधिलाई संसद् पठाउन पाएको छ । निर्वाचनमा अध्यक्ष ओलीसँगै पार्टीका सबै शीर्षस्थ नेता पराजित भएका थिए । 
‘मनोबल गिराउनुपर्ने कुनै आवश्यकता छैन । हामी उच्च मनोबलका साथ अगाडि बढ्दै जानुपर्छ किनभने हामी सत्यको पक्षमा छौं । सत्यको मार्गमा छौं,’ ओलीले भने । मुलुकको आन्तरिक राजनीति पनि सहज नरहेको जिकिर गर्दै उनले पार्टी पंक्तिलाई उच्च मनोबलका साथ अगाडि बढ्न निर्देशन दिए । ‘निर्वाचन परिणामबारे धेरै टिप्पणी गर्ने बेला भएको छैन,’ उनले भने, ‘यो निर्वाचन परिणाम अनपेक्षित, अस्वाभाविक, अपत्यारिलो र जादुमय छ ।’
निर्वाचनको परिणामबाट हरेश नखाई देश र जनताका पक्षमा दृढतापूर्वक काम गर्न उनले आफ्ना सांसदहरूलाई निर्देशन पनि दिए । उनले भने, ‘हामीविरुद्ध तथ्य र तर्कमा आधारित नभई असभ्य र भ्रमपूर्ण रूपमा प्रहार हुनसक्ने भएकाले त्यसको डटेर सामना गर्न एकजुट हुनुको विकल्प छैन । अहिले नै हामीले हरेस खानुपर्ने कुनै आवश्यकता छैन । हामी सत्यको मार्गमा थियौं, छौं र रहनेछौं ।’ त्यस्तै, उनले पार्टीका नीति र निर्णयबमोजिम अनुशासित भएर नेता र सांसद प्रस्तुत हुनुपर्नेमा जोड दिए । 
ओलीले वर्तमान विश्व राजनीति असाधारण र चुनौतीपूर्ण अवस्थाबाट गुज्रिरहेको भन्दै त्यसको प्रभावबाट नेपाल पनि अलग नरहेको बताए । उनले अहिलेको अस्थिर समयमा एमालेले मानवता, न्याय, सत्य र शान्तिको निष्ठापूर्ण राजनीति गरिरहेको दाबी पनि गरे । 
नवनिर्वाचित सांसदहरुलाई सम्बोधनका क्रममा अध्यक्ष ओलीले पार्टीका नेता तथा कार्यकर्ताहरू सामाजिक सञ्जालमा सक्रिय नभएको भन्दै असन्तुष्टि व्यक्त गरे ।  एमालेविरुद्ध भइरहेका भ्रमपूर्ण प्रचारको प्रतिवाद गर्न कार्यकर्ताहरू पछि हटेको उनको भनाइ छ । ‘हाम्रो विरुद्ध भइरहेका हमलाको प्रतिवादमा ध्यान पुगेन । अरूले गरिदिए हुन्थ्यो भन्ने प्रवृत्ति देखियो,’ ओलीले भने,‘सत्य कुरा बोल्न र गलतको खण्डन गर्न हामी आफैं तयार हुनुपर्छ । सामाजिक सञ्जालको अत्यधिक प्रयोग गरेर भ्रमहरू चिर्न आवश्यक छ ।’
उनले कार्यकर्ताहरूले सामाजिक सञ्जालमा अनावश्यक विषयमा स्टाटस लेख्ने गरेको तर पार्टीको प्रतिरक्षामा मौन बस्ने गरेको भन्दै त्यस्तो प्रवृत्ति सच्याउनुपर्नेमा जोड दिए ।