परम्परागत वेषभूषामा सांसद्

काठमाडौं । आमाले सिलाइदिएको लहङ्गा र चोलियासहित पुख्र्यौली थारु वेषभूषामा सजिएकी सांसद गीता चौधरीले संसद्मा आफ्नै मातृभाषा थारुमा सपथ लिइन् । उनले सपथ लिन आउँदा सानी छोरीलाई पनि परम्परागत लुगा लगाइदिएकी थिइन । 
‘मेरो समुदायका लागि आज गौरवको दिन हो,’ चौधरीले प्रतिनिधिसभामा सपथ लिएपछि प्रतिक्रिया दिइन्, ‘संघीयताको मर्मअनुसार मौलिक पहिचान लिएर थारु वेषभूषामा आएकी हुँ । आमा र देश मेरा लागि उस्ता उस्तै हो ।’  आफूले लगाएको पहिरन आमाले सिलाइदिएको उनले बताइन । 
संसद् देशका जनताको प्रतिविम्ब झल्किने साझा फूलबारी जस्तै भएकाले पहिचान खुलाएर आउनु सान्दर्भिक लागेको सांसद चौधरीले बताइन ।  उनले भनिन्, ‘मैले छोरीलाई परम्परागत लुगा लगाएर ल्याएकी छु । जुन आउने पुस्तालाई संस्कृति हस्तान्तरण गराउनु जरुरी छ ।’ 
शिरमा लगाएको पुर्खौली गहना ‘मङ्गौरी’, घाटीमा लगाउनेमाला ‘टौक’लगायत चाँदीले बनेका गहना देखाउँदै उनले सबै गरगहना पुस्तैनी रहेको बताइन । संघीयताको मर्म र भावना अनुरुप प्रतिनिधिसभामा समावेशिताको अर्थ बुझाउन सांसद चौधरीले जस्तै परम्परागत वेषभूषामा उपस्थिति अरु पनि रहे । 
परम्परागत पहिरनमा सबैको ध्यान तानेकामध्ये सुधन गुरुङ एक थिए । गोरखाका उनी टोपीमा खुकुरीको आकृति झल्काउँदै गुरुङ पोसाकमा उपस्थिति थिए । पहिरनसँगै मुहारमा उत्साह र जोश झल्किएको थियो । उनले भने, ‘जनताको भावना मर्न दिने छैनौं ।’ 
नेपाली कम्युनिष्ट पार्टीबाट सांसद दाङकी भीमकुमारी बुढामगरले समावेशीको सन्देश दिन पुर्खौली वेषभूषामा सपथ ग्रहण गर्न आएको बताइन । मगर समुदाय सांस्कृतिक हिसाबले अत्यन्त समृद्ध समुदाय रहेको सुनाउँदै समाजमा पहिचान स्थापित गर्न पहिरनले महŒवपूर्ण सन्देश झल्किने धारणा राखिन् । ‘सांस्कृतिक महŒव कहिल्यै भुल्नुहुँदैन,’ उनले भनिन्, ‘यही लगाएर हुर्किएँ यही लगाएर संसद्मा आएँ ।’
रास्वपाका सांसद महोत्तरीका प्रमोदकुमार महतोले श्रीराम लेखिएको गम्छा र शिरमा रातो रुमाल भिरेका थिए । कुर्था सुरुवाल लगाएका उनले तराई क्षेत्रको पहिरन पहिचान भएको बताए । ‘पहिरनले अपनत्व महसुस गराउँछ भने राष्ट्रिय भाव बलियो बनाउछ,’ उनले भने, ‘म सांसद नहुँदा मौलिक पहिरन नै लगाउँछु । आज संसद्मा उपस्थिति हुँदा नलगाउने कुरै भएन ।’ संसद्मा उपस्थित धेरै सांसदहरु समुदायको पहिचान झल्किने पहिरनमा उत्साहका साथ उपस्थित थिए । 
ट्रान्सजेण्डरको प्रतिनिधित्व गर्दै रास्वपाबाट सांसद भएकी भूमिका श्रेष्ठ  आफ्नो नेवार समुदायको संस्कृति झल्किने हाकुपटासी सारीमा देखिइन । ‘समुदायको सम्मानसँगै, जनताको सेवा गर्नुपर्छ,’ श्रेष्ठले भनिन् । (रासस)