महिला, बालबालिका मन्त्रालय कायमै राख्न आग्रह

काठमाडौं । बालबालिका शान्तिक्षेत्र राष्ट्रिय अभियान (सिजप)ले मन्त्रालयको संख्या घटाउँदा महिला, बालबालिका तथा ज्येष्ठ नागरिक मन्त्रालयलाई कायमै राख्न आग्रह गरेको छ । सो अभियानका अध्यक्ष तिलोत्तम पौडेलद्वारा आज जारी विज्ञप्तिमा उक्त मन्त्रालय विघटन, अन्य मन्त्रालयमा गाभ्ने वा नाम परिवर्तन गर्नेजस्ता विषय संवेदनशील र दूरगामी प्रभाव पार्ने भएकाले सोचेर निर्णय लिन आग्रह गरिएको छ ।
कुल जनसंख्याको करिब ३३ दशमलव ८४ प्रतिशत हिस्सा बालबालिकाले ओगटेका छन् । बालबालिका वर्तमानका साझेदार मात्र नभई भविष्यका धरोहर, राष्ट्रका गौरव तथा भोलिका दक्ष जनशक्ति भएकाले यस्तो महत्वपूर्ण जनसंख्या समूहसँग प्रत्यक्ष सम्बन्धित मन्त्रालयलाई कमजोर बनाउने वा अन्य मन्त्रालयमा गाभ्ने कार्यले बालअधिकार संरक्षण तथा प्रवद्र्धनमा गम्भीर असर पार्ने अभियानको भनाइ छ ।