सत्तामा लेखक

शुक्रबार संस्कृति, पर्यटन तथा नागरिक उड्डयनमन्त्री नियुक्त भएका खडकराज पौडेल ‘गनेस’का बारेमा धेरैलाई थाहा नहुन सक्छ । उनका बारेमा थाहा हुनेलाई पनि पौडेल राजनीतिक दलका नेता भन्दा लेखक, साहित्यकार र अभियन्ताका रुपमा बढी परिचित थिए ।
तर उनी गत फागुन २१ गते सम्पन्न प्रतिनिधिसभा सदस्य निर्वाचनमा कास्की–१ बाट निर्वाचित भए । उनको राजनीतिक यात्राले शुक्रबारदेखि थप अर्को फड्को मारेको छ । जसले गर्दा पर्यटकीय राजधानी पोखरामा जन्मिएका उनलाई मुलुकको सिङ्गो पर्यटन क्षेत्र सुधारको जिम्मेवारी प्राप्त भएको छ ।
साहित्यिक वृत्तमा गनेस पौडेल नामले परिचित उनले यसअघि पोखरामा बसेर साहित्य लेखन, पठन संस्कृतिको प्रवद्र्धनसँगै सामाजिक मुद्दामा पैरवी गर्ने व्यक्तिको छवि बनाएका थिए । पौडेलले वातावरण, सम्पदा, कला, संस्कृति संरक्षणका मुद्दालाई विभिन्न कोणबाट प्रखर रूपमा उठाउँदै आएका थिए । २०७४ सालमा उनले पहिलो उपन्यास ‘पैताला’ प्रकाशन गरेका थिए । उनी अखबारी लेखनमा पनि उत्तिकै सिद्धहस्त छन् ।
विश्वप्रसिद्ध लेखक जोन स्टेनबेकको पुस्तक ‘अफ माइस एन्ड मेन’को नेपाली संस्करण ‘मुसा मानुष’ पनि पौडेलद्वारा अनुदित कृति हो । पौडेल पोखरामा पठन संस्कृतिको विकासका लागि स्थापित ¥यान्डम रिडर्स सोसाइटी अफ नेपालका परिकल्पनाकारसमेत हुन् । पोखरा अन्तरराष्ट्रिय विमानस्थल प्रभावित क्षेत्रका नागरिकका सरोकारका विषय उठानमा पनि उनले नेतृत्वदायी भूमिका निर्वाह गरेका थिए ।
विसं २०३६ मा पोखरा महानगरपालिका–१४ मझेरीपाटनमा जन्मिएका पौडेलले पोखरा विश्वविद्यालयबाट एमबीए र त्रिभुवन विश्वविद्यालयबाट अंग्रेजी साहित्यमा स्नातक गरेका छन् । उनीसँग शिक्षण पेसाको समेत अनुभव छ । पौडेल २०७९ सालको स्थानीय तह निर्वाचनमा पोखरा महानगरपालिको प्रमुख पदमा स्वतन्त्र उम्मेदवार भएर उठेका थिए ।
त्यसबेला ‘लौरो’ चिह्न लिएर चुनाव लडेका उनले पाँच हजार १२८ मत प्राप्त गर्दै पराजित भएका थिए । पौडेलले दलीय एकाधिकार, भ्रष्टाचार र बेथितिविरुद्ध ‘अटेरी अभियान’ सञ्चालन गरेका थिए । साहित्य लेखनसँगै सामाजिक अभियानमा आफूलाई क्रियाशील बनाउँदै प्रतिनिधिसभा सदस्यमा निर्वाचित हुन सफल उनले बालेन्द्र शाह नेतृत्वको सरकारमा महŒवपूर्ण मन्त्रालयको जिम्मेवारी प्राप्त गरेका छन् ।
पौडेल पर्यटनमन्त्री नियुक्त भएसँगै पर्यटकीय राजधानी पोखराका पर्यटन व्यवसायीलगायतले पर्यटन क्षेत्रको सुधार र दिगो विकासको अपेक्षा गरेका छन् । उनको कार्यकालमा पर्यटन क्षेत्रमा नीतिगत सुधारसँगै लगानीको सुरक्षा, पर्यटन पूर्वाधार विकास र प्रवद्र्धनका कामले गति लिने विश्वास गरिएको छ ।