पुँजीबजारमा उत्साह, पाँचमा चार दिन हरियाली

काठमाडौँ । स्थिर सरकार गठन हुने अपेक्षामा लगानीकर्ता उत्साहित हुँदा सेयर बजारमा लगातारजसो हरियाली छाउन थालेको छ । राष्ट्रिय स्वतन्त्र पार्टी नेतृत्वमा शक्तिशाली सरकार गठन हुनुअघि साताका पाँच कारोबार दिनमा चार दिन सेयर बजार उकालो लागेको हो ।
नेप्से परिसूचक साताभरमा २८७७.०३ अंकबाट ७३.१३ अंकले बढेर २९५०.१६ अंकमा उक्लिएको छ । नेप्से आइतबार ५४.५१, सोमबार ५.०१, मंगलबार २३.८३ र बिहीबार १४.२१ अंकले बढेको छ । बुधबार भने बजार २४.४५ अंकले घटेको थियो ।
आइतबार बजार परिसूचक ५४.५१ अंकले मात्र बढेन, आठ महिनायताकै उच्च कारोबार पनि भयो । आइतबारको वृद्धिसँगै नेप्से २९३१.५५ अंकमा उक्लियो । कारोबार रकम पनि बढ्यो । गत साताको बिहीबार २१ अर्ब २२ करोड ३४ लाख ९४ हजार ८८६ रुपैयाँ बराबरको कारोबार भएको बजारमा आइतबार २३ अर्ब ५९ करोड ७७ लाख १२ हजार रुपैयाँबराबरको ६ करोड १४ लाख ७ हजार कित्ता शेयर खरिद–बिक्री भयो ।
आइतबार नेप्सेमा सूचीकृतमध्ये १२ उपसमूह बढे । व्यापार उपसमूहमात्र घट्यो । बजार बढ्दा १८३ कम्पनीका लगानीकर्ताले कमाए । पाँचवटा कम्पनीको शेयर मूल्यमा सकारात्मक सर्किट लाग्यो । त्यस्तै ७३ कम्पनीको शेयर मूल्य घट्यो भने आठवटाको स्थिर रह्यो ।
कारोबार रकमका आधारमा आइतबार कुमारी बंैक शीर्ष स्थानमा रह्यो । आइतबार कुमारीको ८५ करोड ९६ लाख १५ हजार रुपैयाँबराबरको शेयर कारोबार भयो ।
सोमबार भने नेप्से परिसूचक सामान्य अंकले मात्र बढ्यो । सोमबार नेप्से परिसूचक ५.०१ अंकले बढेर २९३६.५६ को अंकमा उक्लियो । त्यस्तै ३४२ कम्पनीको तीन करोड ८० लाख ७३ हजार ९४५ कित्ता शेयर एक लाख ५६ हजार ३८१ पटक खरिद–बिक्री हुँदा १५ अर्ब ७८ करोड ६३ लाख १३ हजार ४४० रुपैयाँबराबरको कारोबार भयो ।
सोमबार वित्त ०.२०, जलविद्युत् ०.९६, लगानी ०.७२, उत्पादन तथा प्रशोधन १.५३, लघुवित्त ०.४३, म्युचुअल फन्ड ०.८८ र अन्य समूह ०.०१ प्रतिशतले बढ्यो भने बाँकी समूह घट्यो ।
सोमबार सालपा विकास बैंक, रिलायन्स स्पिनिङ मिल्स, सोलु हाइड्रोपावर र भुजुङ हाइड्रोपावरको शेयर मूल्यमा सकारात्मक सर्किट लाग्यो । कारोबार रकम र कारोबार भएका शेयर संख्याका आधारमा कुमारी बैंकको सबैभन्दा धेरै ६७ करोड २३ लाख ७८ हजार रुपैयाँको २७ लाख ६८ हजार १०९ कित्ता शेयर खरिद–बिक्री भयो ।
नेप्से परिसूचक मंगलबार पनि बढ्यो । गत साताको मंगलबारदेखि सुरु भएको बजार बढ्ने क्रमले मंगलबारसम्म निरन्तरता पायो । सोमबार ५.०१ अंकले बढेको बजार मंगलबार २३.८३ अंकले बढेर २९६०.४० अंकमा उक्लियो ।
मंगलबार सूचक बढे पनि कारोबार रकम भने सामान्य घट्यो । सोमबार १५ अर्ब ७८ करोड रुपैयाँबराबरको कारोबार भएको बजारमा मंगलबार १४ अर्ब ८३ करोड ९१ लाख ८३ हजार रुपैयाँबराबरको ३ करोड ५८ लाख २२ हजार कित्ता शेयर खरिद–बिक्री भयो ।
नेप्सेमा सूचीकृतमध्ये आठ समूह बढे भने ५ समूह घटे । सबैभन्दा धेरै व्यापार समूह ९.१२ प्रतिशतले बढ्यो । १३६ कम्पनीको शेयर मूल्य बढ्दा ११७ वटाको घट्यो भने ११ वटाको शेयर मूल्य स्थिर रह्यो । सालपा विकास बैंक र रिलायन्स स्पिनिङ मिल्सको शेयर मूल्य १० प्रतिशतले बढ्यो ।
कारोबार रकमका आधारमा मंगलबार राधी विद्युत् कम्पनी शीर्ष स्थानमा रह्यो । राधीको ६७ करोड ४३ लाख ८४ हजार रुपैयाँबराबरको शेयर कारोबार भयो । त्यस्तै, अपी पावर ५७ करोड ८७ लाख ४९ हजार, जलविद्युत् लगानी तथा विकास कम्पनी ४५ करोड ७० लाख ७२ हजार, ङादी ग्रुप पावर ४१ करोड ३१ लाख १५ हजार र शिवम् सिमेन्ट्स ३९ करोड १० लाख १० हजार रुपैयाँबराबरको शेयर किनबेच भयो ।
बुधबार भने नेप्सेमा करेक्सन आयो । अघिल्ला लगातार पाँच दिनमा १६१.५७ अंकले बढेको बजारमा बुधबार २४.४५ अंकको करेक्सन आएको हो ।
नेप्से बुधबार २४.४५ अंकले घटेर २९३५.९४ अंकमा ओर्लियो । सूचक घटे पनि कारोबार रकम भने बढ्यो । मंगलबार १४ अर्ब ८३ करोड ९१ लाख ८३ हजार रुपैयाँबराबरको ३ करोड ५८ लाख २२ हजार कित्ता शेयर कारोबार भएको बजारमा बुधबार १५ अर्ब ९ करोड ४ लाख १६ हजार रुपैयाँबराबरको ३ करोड ५८ लाख १९ हजार कित्ता शेयर किनबेच भयो ।
नेप्सेमा सूचीकृतमध्ये दुई समूह बढे भने ११ समूह घटे । ४६ कम्पनीको शेयर बढ्दा २१३ वटाको घट्यो भने सात वटाको शेयर मूल्य स्थिर रह्यो । बजार घट्दा पनि रिलायन्स स्पिनिङ मिल्स र सुपर खुदी हाइड्रोपावरको शेयर मूल्य १० प्रतिशतले बढ्यो । कारोबार रकमको आधारमा बुधबार ङादी ग्रुप पावर ५२ करोड ४७ लाख ४७ हजार रुपैयाँबराबरको कारोबारसहित शीर्ष स्थानमा रह्यो ।
साताको अन्तिम कारोबार हुने दिन बिहीबार नेप्से बढ्यो । बुधबार २४.४५ अंकले घटेको बजार बिहीबार १४.२१ अंकले बढेर २९५०.१६ अंकमा उक्लियो । बिहीबार सूचक बढे पनि कारोबार रकम भने घट्यो । बुधबार १५ अर्ब ९ करोड ४ लाख १६ हजार रुपैयाँबराबरको ३ करोड ५८ लाख १९ हजार कित्ता शेयर किनबेच भएको बजारमा बिहीबार १३ अर्ब १६ करोड २२ लाख ९८ हजार रुपैयाँबराबरको ३ करोड ४ लाख ३८ हजार कित्ता शेयर कारोबार भयो ।
नेप्सेमा सूचीकृतमध्ये नौ समूह बढ्दा दुई समूह घटे । सबैभन्दा धेरै जलविद्युत् १.५६ प्रतिशतले बढ्यो । १७८ कम्पनीको शेयर मूल्य बढ्दा ८० वटाको घट्यो भने आठ वटाको स्थिर रह्यो ।
बिहीबार तीनवटा कम्पनीको शेयर मूल्यमा सकारात्मक सर्किट लाग्यो । रिलायन्स स्पिनिङ मिल्स, सुपर खुदी हाइड्रोपावर र होटल फरेष्ट इनको शेयर मूल्य १० प्रतिशतले बढेको हो । त्यस्तै सोलु हाइड्रोपावर ९.९९ र भुजुङ हाइड्रोपावर ९.९९ प्रतिशतले बढ्यो । कारोबार रकमका आधारमा ९४ करोड २९ लाख रुपैयाँसहित एनआरएन इन्फ्रास्ट्रक्चर एन्ड डेभलपमेन्ट शीर्ष स्थानमा रह्यो । मंगलबार सूचक बढे पनि कारोबार रकम भने सामान्य घट्यो ।