चौतारा अस्पतालको सेवा उत्कृष्ट

सिन्धुपाल्चोक । न्यूनतम सेवा मापदण्ड कार्यान्वयन तथा ‘क्लिनिकल अडिट’ मा सदरमुकामस्थित चौतारा अस्पताल मुलुकभरमा उत्कृष्ट भएको छ । ५० शयया अन्तर्गतका अस्पतालमा गरिएको न्यूनतम सेवा मापदण्ड मापन ‘ए’ लेभलमा चौतारा अस्पतालले ९६ अंक प्राप्त गरी उत्कृष्ट बनेको छ ।
बागमती प्रदेश सरकार स्वास्थ्य मन्त्रालय स्वास्थ्य निर्देशनालयले अस्पतालको अनुगमन प्रशासनिक व्यवस्थापनमा ९७ प्रतिशत, क्लिनिकल सेवा प्रभावमा ९५ प्रतिशत र अस्पताल सपोर्ट सर्भिसमा ९७ प्रतिशत गरी ९६ प्रतिशत अंक ल्याई चौतारा अस्पताल न्यूनतम सेवा मापदण्ड कार्यान्वयनमा मुलुकभरमा उत्कृष्ट भएको हो ।
निर्देशनालयले चैत ८ र ९ गते २०८२ मा चौतारा अस्पतालमा न्यूनतम सेवा मापदण्ड अनुगमन गरेको थियो । वरिष्ठ मेडिकल सुपरिन्टेन्डेट डा. राजेन्द्र लामासहितको पाँचसदस्यीय अनुगमन समूहले २६ वटा सूचकांकका आधारमा चौतारा अस्पतालको अनुगमन गरेको थियो ।
चौतारा अस्पतालको रेकर्डिङ, नियमित मर्निङ कन्फरेन्स डेटा भेरिफिकेसनलगायतका काम उत्कृष्ट देखिएकाले उत्कृष्ट घोषणा गरिएको बताउँदै डा. लामाले सेवा गुणस्तरमा निरन्तर सुधारको संकेत गरेको देखाएकाले सो अस्पताललाई उत्कृष्ट घोषणा गरिएको बताए । आगामी वर्ष शतप्रतिशत अंक ल्याउने गरी सेवा सुविधा प्रवाह गर्ने अस्पतालका अध्यक्ष केशवराज गिरीले बताए । 
अस्पतालको सेवा र गुणस्तरमा अझै सुधार ल्याई आगामी दिनमा थप राम्रो गर्ने अस्पतालका सुपरिन्टेन्डेन्ट डा. रुद्रमणि भण्डारीले बताए । अहिले पाएको परिणाम पनि सबै कर्मचारी र सबैको मेहनतले पाएको उपलब्धि भएको डा. भण्डारीले बताए । ‘सेवाग्राही, स्थानीयले अझै पनि बिरामीलाई गुणास्तरीय स्वास्थ्य सेवा दिन बताइरहेका छन्, त्यसमा हामी सबैले मेहनतका साथ उपचार सेवा दिँदै आएका छौं,’ उनले बताए । अस्पतालले बिरामीको स्वास्थ्य उपचारलाई प्रमुख जिम्मेवारी गहन गरेर सबै प्रकारका सेवामा प्रभावकारिता ल्याउने भण्डारीको भनाइ छ ।