जेनजी सहिद परिवारका २७ जनालाई विद्युत् प्राधिकरणमा रोजगारी

काठमाडौं । नेपाल विद्युत् प्राधिकरणले जेनजी आन्दोलनका २७ जना सहिदका परिवारका सदस्यलाई रोजगारी दिने भएको छ । प्राधिकरणले भदौ २३ र २४ गतेको जेनजी आन्दोलनका क्रममा ज्यान गुमाएका २७ जना सहिदको परिवारका सदस्यलाई रोजगारी दिने प्रक्रिया अगाडि बढाएको हो ।
विद्युत् प्राधिकरणको पुस २२ गतेको सञ्चालक समितिको बैठकले जेनजी सहिद परिवारका २७ जनालाई रोजगारी दिन गरेको निर्णय कार्यान्वयन गर्न लागेको हो । प्राधिकरणले आइतबार रोजगारीको अवसर पाउने परिवारका सदस्यको नाम सार्वजनिक गरी सम्पर्कमा आउन आग्रह गरेको छ । प्राधिकरणले सहिद परिवारका सदस्यलाई रोजगारी पेस गरिएको निवेदनका आधारमा रोजगार गर्न इच्छुक २७ जनाको नाम सार्वजनिक गरेको छ ।
सहिद परिवारका २७ जनाबाट प्राप्त निवेदनका आधारमा, उनीहरूको यकिन गरी पायक पर्ने प्राधिकरण कार्यालयहरूमा शैक्षिक योग्यताअनुसार बढीमा तीन तहसम्म करार नियुक्ति दिने व्यवस्था प्राधिकरणले गर्न लागेको हो । सरकार र जेनजी आन्दोलनका प्रतिनिधिबीच भएको सम्झौता, मन्त्रिपरिषद्बाट स्वीकृत सहायतासम्बन्धी कार्यविधि तथा सहिद परिवारका सदस्यहरूको निवेदनका आधारमा यो निर्णय गरिएको थियो ।
प्राधिकरणले रोजगारी माग गर्ने सहिद परिवारका सदस्यको नाम, सहिदको नामा, ठेगाना, नाता सम्बन्धको सूची सार्वजनिक गरी सम्पर्कमा आउन भनेको हो । सहिद परिवारका सदस्यलाई दिन लागिएको रोजगारीको अवसरमा निवेदन प्राप्त भएका परिवारबाहेक अरू कसैको हकदाबी लाग्ने भएमा ३५ दिनभित्र प्राधिकरणसमक्ष प्रमाणसहित दाबी पेस गर्न पनि प्राधिकरणले सूचनामार्फत आग्रह गरेको छ ।
रोजगारीका लागि इच्छुक सहिद परिवारका सदस्यले पेस गरेको निवेदनको सूची ऊर्जा, जलस्रोत तथा सिँचाइ मन्त्रालयले २०८२ मंसिर २० गते प्राधिकरणलाई उपलब्ध गराएको थियो । अहिले प्राधिकरणले जेनजी प्रदर्शन तथा आन्दोलनमा घाइते भएका नागरिकलाई राहत सहायता उपलब्ध गराउनेसम्बन्धी कार्यविधि २०८२ अनुसार सहिद परिवारका सदस्यलाई रोजगारी उपलब्ध गराउन लागिएको हो ।