सेवा–प्रवाह प्रभावकारी बनाउन कर्मचारीलाई ऊर्जामन्त्री श्रेष्ठको निर्देशन

काठमाडौं । ऊर्जा, जलस्रोत तथा सिँचाइ मन्त्री विराजभक्त श्रेष्ठले जनताले महसुस गर्ने गरी सेवा प्रवाहमा लाग्न कर्मचारीलाई निर्देशन दिएका छन् । मन्त्री श्रेष्ठले आइतबार ऊर्जा, जलस्रोत तथा सिँचाइ मन्त्रालयको उच्च नेतृत्वलाई सेवा प्रवाहलाई अझ प्रभावकारी, पारदर्शी र नागरिकमुखी बनाएर काम गर्न निर्देशन दिएका हुन् । 
उनले ऊर्जा क्षेत्रको दिगो विकास, जलस्रोतको समुचित उपयोग तथा सिँचाइ प्रणाली विस्तारमार्फत कृषि उत्पादन वृद्धि गर्ने सरकारको लक्ष्य पूरा गर्न स्पष्ट कार्ययोजना, समयबद्ध कार्यान्वयन र उत्तरदायित्वपूर्ण कार्यशैली सबै कर्मचारीले अपनाउन आवश्यक रहेको बताए ।
‘मन्त्रालयभित्र समन्वय, अनुशासन र परिणाममुखी कार्यसंस्कृतिको विकास गर्नुपर्ने आवश्यकता देखिन्छ,’ उनले भने, ‘हिजोको दिनमा जे भएपनि अब सबै कर्मचारीले आफ्नो जिम्मेवारीप्रति पूर्ण प्रतिबद्ध, इमानदार भई उच्च मनोबलका साथ काम गर्नुपर्छ,’ उनले भने ।
ऊर्जा क्षेत्रको विकासका लागि निर्धारण गरिएका लक्ष्य पूरा गर्न कर्मचारीले पनि आफ्नो दायित्व पूर्णरूपमा निभाउनु पर्नेमा उनले जोड दिए । कर्मचारीहरूले काम गर्दै जाँदा आउने चुनौतीलाई पनि अवसर मानेर काम गर्नुपर्ने निर्देशन दिँदै श्रेष्ठले नीति, योजना र कार्यान्वयनबीच प्रभावकारी समन्वय कायम गरी मन्त्रालयको कार्यक्षमता अभिवृद्धि गर्ने प्रतिबद्धता जनाए । 
नयाँ सरकारले मुलुकको आर्थिक समृद्धिको मेरुदण्ड मानिएको ऊर्जा क्षेत्रमा व्यापक सुधार गर्ने घोषणा गरी विद्युत उत्पादन, प्रसारण र व्यापारमा रहेका नीतिगत तथा संरचनागत गाँठो फुकाउने रणनीति लिएको छ । सरकारले सार्वजनिक गरेको कार्ययोजना अनुसार अबको १८० दिन (६ महिना) भित्र वर्षौंदेखि रोकिएका विद्युत् खरिद सम्झौता (पीपीए) गर्ने, एक महिनाभित्र ‘ऊर्जा निर्यात रणनीति’ तयार गर्ने, नेपाल विद्युत प्राधिकरणको वर्तमान ढाँचामा परिवर्तन गर्ने नीति लिएको छ ।