कांग्रेस १५औं महाधिवेशनको प्रक्रिया शुरु

काठमाडौं । पार्टीभित्रको आन्तरिक विवादकैबिच नेपाली कांग्रेसले आगामी १५औं महाधिवेशनको तयारी औपचारिक रूपमा शनिबारबाट सुरु गरेको छ । पूर्वप्रकाशित कार्यतालिकाअनुसार चैत २१ गतेदेखि वडा तहसम्मै पुग्नेगरी सदस्यता वितरण तथा नवीकरण अभियान सुरु गरेको महामन्त्री प्रदीप पौडेलले बताए । कांग्रेसमा १४औं महाधिवेशनबाट आएको तत्कालीन संस्थापन समूह र विशेष महाधिवेशनबाट आएको नेतृत्वबीच विवाद जारी नै रहँदा अहिलेको संस्थापनपक्ष महाधिवेशनतर्फ अघि बढेको हो । पुस मसान्तमा सम्पन्न विशेष महाधिवेशनबाट गगन थापा नेतृत्वमा सर्वसम्मत केन्द्रीय समिति चयन भएको थियो । आधिकारिकता विवादमा निर्वाचन आयोगले यो समितिलाई मान्यता दिएपछि इतरपक्षले दायर गरेको रिट सर्वोच्च अदालतमा विचाराधीन छ । 
शनिबार केन्द्रीय कार्यालय सानेपामा बसेको कार्यसम्पादन समितिको बैठकले ७७ जिल्लामा खटिने केन्द्रीय प्रतिनिधिहरुलाई सदस्यता वितरण अभियानलाई तीव्रता दिन र व्यवस्थित गर्न प्रशिक्षित गरेको छ । कांग्रेसले गाउँ तहसम्म पुग्ने पार्टीको अभियानलाई ‘जरा अभियान’ भनेको पार्टीको कार्यसम्पादन समितिको बैठकपछि महामन्त्री पौडेलले जानकारी दिए । यस अभियानअन्तर्गत महाधिवेशनको तयारी, सांगठिक अवस्थाको अध्ययन, नागरिकस्तरमा निर्वाचनको समीक्षा र पार्टीलाई सामाजिक गतिविधिसँग जोड्ने चार वटा मुख्य कामहरू हुने उनले बताए । 
७७ वटै जिल्लामा खटिएका प्रतिनिधिहरूलाई वैशाख महिनामा तोकिएको जिल्लामा बसेर सदस्यता वितरण र नवीकरणलाई विधानबमोजिम व्यवस्थित गर्ने जिम्मा दिइएको छ । उनीहरूलाई पार्टी केन्द्रीय कार्यालयले आवश्यक निर्देशिका, कार्यविधि, फाराम र तोकिएको जिम्मेवारी दिएर जिल्ला पठाएको छ । 
त्यस्तै, जिल्लामा खटिएका प्रतिनिधिहरूले पार्टीको मूल संगठन र भ्रातृ संगठनहरूको यथार्थ अवस्था तथा केन्द्रले सम्बोधन गर्नुपर्ने विषयहरू समेटेर प्रतिवेदन बुझाउनेछन् । यसका अतिरिक्त, कांग्रेसले विगतको निर्वाचनमा भोगेको पराजय र पार्टीको आगामी बाटोबारे नागरिकस्तरमै पुगेर अन्तरक्रिया गर्ने निर्णय गरेको छ । 
नवीकरण नगरे क्रियाशील निष्क्रिय 
कांग्रेसले क्रियाशील सदस्यता नवीकरणमा कडाइ गर्ने तयारी गरेको छ । वैशाख महिनाभित्र सदस्यता अद्यावधिक नगर्नेहरूको क्रियाशील सदस्यता स्वतः खारेज गर्ने कांग्रेस निर्णय छ । सदस्यहरूले विगतमा जुन भूगोल वा वडाबाट सदस्यता लिएको हो, त्यही वडामा पुगेर अनिवार्य रूपमा नवीकरण गर्नुपर्ने छ । त्यसैगरी, कांग्रेसले पार्टीलाई प्रविधिमैत्री बनाउने भन्दै सबै सदस्यलाई ‘कांग्रेस आइडी’ प्रदान गर्ने जनाएको छ । आइडी नभएका व्यक्तिले १५औं महाधिवेशनको कुनै पनि प्रक्रियामा भाग लिन पाउने छैनन् ।  
पुनर्जागरणका लागि गगन संवाद 
फागुन २१को प्रतिनिधिसभाको निर्वाचनमा अनपेक्षित पराजय बेहोरेको कांग्रेसले पार्टीलाई पुनर्जागृत गर्र्ने उद्देश्यले सभापति गगन थापा नेतृत्वमा राष्ट्रिय स्तरमा संवाद कार्यक्रम सञ्चालन गर्ने भएको छ । पार्टीको अभिमुखीकरणपछि महामन्त्री प्रदीप पौडेलले केन्द्रीय समितिको निर्णयअनुसार नागरिकसँग प्रत्यक्ष अन्तरक्रिया कार्यक्रम अघि बढाइने बताए । 
‘कांग्रेसले हालैको निर्वाचनमा भोगेको हारको समीक्षा गर्न तथा पार्टीलाई पुनः सशक्त बनाउने उपाय खोज्न देशव्यापी संवाद अभियान सञ्चालन गर्दै छौं । त्यसैले राष्ट्रिय स्तरमा बुद्धिजीवी, पेसाकर्मी, नागरिक अगुवा र विभिन्न क्षेत्रका प्रतिनिधिसँग सभापतिको नेतृत्वमा अन्तरक्रिया र समीक्षा गर्ने योजना बनाएका छौं,’ उनले भने,‘केन्द्रीयस्तरमा पार्टी सभापति गगन थापाको नेतृत्वमा बुद्धिजीवी, पेसाकर्मी र नागरिक अगुवाहरूसँग ‘कांग्रेसले चुनाव किन हा¥यो र अब कसरी पुनर्जीवित हुने’ भन्ने विषयमा बृहत् छलफल गर्ने छौं ।’
फागुन २१ को निर्वाचनमा १८ स्थानमा जितेको कांग्रेसको समानुपातिकसहित हाल प्रतिनिधिसभामा संख्या ३८ मात्रै छ । यसअघिको संसदमा ८९ सांसदसहित पहिलो दल थियो । अहिले पहिलो दल रास्वपाले १ सय ८२ सिट ल्याउँदा अंकगणितका हिसाबले ३८ सिटसहित कमजोर प्रतिपक्ष भएको छ । निर्वाचनपछि आन्तरिक कलहमै अलमलिएको पार्टी अब भने नागरिक तहमा जान लागेको हो ।