सभामुखमा अर्याल निर्विरोध

काठमाडौं । प्रतिनिधिसभाको सभामुखमा डोलप्रसाद अर्याल निर्विरोध निर्वाचित भएका छन् । प्रतिनिधिसभाको आइतबारको बैठकले उनलाई मुलुकको दसौं सभामुखका रूपमा चयन गरेको हो । अरु दलबाट उम्मेदवारी नपरेपछि उनी निर्विरोध निर्वाचित भएका हुन् । 
बैठकमा रास्वपा सभापति रवि लामिछानेले उपसभापति अर्याललाई सभामुख पदमा निर्वाचित गरियोस् भनी प्रस्ताव प्रस्तुत गरेका थिए ।  प्रस्तावलाई सांसदहरू सोविता गौतम, स्वर्णिम वाग्ले र सुनिल लम्सालले समर्थन गरेका थिए । सभाको अध्यक्षता गरिरहेका ज्येष्ठ सदस्य अर्जुननरसिंह केसीले एक मात्र प्रस्ताव प्राप्त भएकाले अर्याल निर्विरोध निर्वाचित भएको घोषणा गरेका थिए । 
निर्वाचनपछि राष्ट्रपति रामचन्द्र पौडेलले सभामुख अर्याललाई पद तथा गोपनीयताको शपथ गराएका थिए । राष्ट्रपति भवनमा सम्पन्न उक्त कार्यक्रममा उपराष्ट्रपति रामसहायप्रसाद यादव, प्रधानमन्त्री वालेन्द्र शाह, सर्वोच्च अदालतका कायममुकायम प्रधानन्यायाधीश सपना प्रधान मल्ल, राष्ट्रियसभाका अध्यक्ष नारायणप्रसाद दाहाललगायत उच्चपदस्थ पदाधिकारीहरूको उपस्थिति थियो।
पदभार ग्रहणपछि प्रतिक्रिया दिँदै सभामुख अर्यालले जेनजी युवाले आन्दोलन गर्न नपर्ने गरी कानुन, नीति र नियम निर्माणमा ध्यान दिने प्रतिबद्धता व्यक्त गरे । ध्वस्त संरचना पुनर्निर्माणका लागि आवश्यक परे नयाँ कानुन ल्याएर छिटो काम अघि बढाइने उनले बताए ।
सभामुख अर्यालले संसद्को गरिमा, मर्यादा र प्रभावकारिता कायम राख्दै निष्पक्ष, सन्तुलित र उत्तरदायी ढङ्गले भूमिका निर्वाह गर्ने प्रतिबद्धता जनाएका छन् । सबै राजनीतिक दल र सांसदसँग सहकार्य तथा समन्वय गरी संसद्लाई प्रभावकारी, उत्तरदायी र जनमुखी संस्थाका रूपमा स्थापित गर्ने उनको योजना छ ।

धादिङको ज्वालामुखी गाउँपालिकामा जन्मेका अर्याल राष्ट्रिय स्वतन्त्र पार्टीका संस्थापक उपसभापति हुन् । यसअघि उनले श्रम, रोजगार तथा सामाजिक सुरक्षा मन्त्रीको जिम्मेवारी सम्हालिसेका छन् । २०७९ सालमा पार्टी स्थापना र वैकल्पिक राजनीतिक यात्रामा उनको महत्वपूर्ण भूमिका छ ।
काठमाडौं–९ बाट निर्वाचित अर्याल २५ वर्षदेखि पर्यटन, शिक्षा र वित्तीय क्षेत्रमा सक्रिय रहँदै आएका छन् । जापानलगायत विभिन्न देशमा अध्ययन, अनुसन्धान तथा व्यवसायिक अनुभव हासिल गरेका उनले स्वदेशमै केही गर्न सकिन्छ भन्ने विश्वासका साथ काम गर्दै आएका छन् ।