जाह्नवीले पोखिन पीडा

बलिउडमा नयाँ पुस्ताकी अभिनेत्री जाह्नवी कपुरले आफ्नो करियरको सुरुवाती चरणमा भोगेको मानसिक तनाव र प्रविधिको दुरुपयोगका कारण झेल्नुपरेको पीडाका बारेमा खुलासा गरेकी छन् । सोमबार मुम्बईमा आयोजित एक मानसिक स्वास्थ्य सम्बन्धी सम्मेलन र हालैको अन्तर्राष्ट्रिय मिडियासँगको विशेष अन्तर्वार्तामा उनले आफ्नो ग्ल्यामरस जीवन पछाडिको संघर्षलाई शब्दमा उतारेकी हुन् ।
जाह्नवी भारतीय सिने जगतकी हलिउड आइकन मानिने दिवंगत अभिनेत्री श्रीदेवी र फिल्म निर्माता बोनी कपुरकी जेठी छोरी हुन् । उनले सन् २०१८ मा मराठी फिल्म ‘सैराट’ को हिन्दी रिमेक ‘धडक’बाट बलिउडमा डेब्यु गरेकी हुन् । छोटो समयमै ‘गुञ्जन सक्सेना’, ‘मिली’, र ‘उलाझ’ जस्ता फिल्महरूमार्फत उनले आफूलाई एक गम्भीर कलाकारको रूपमा स्थापित गरिसकेकी छन् ।
‘धडक’ पछि उनले डिप्रेसन र सामाजिक दबाब अनुभव गरेकी थिइन । उनका अनुसार ‘धडक’ प्रदर्शन हुनु केही अघि मात्रै आमा श्रीदेवीको आकस्मिक निधनले उनलाई विक्षिप्त बनाएको थियो । ‘एकातिर आमा गुमाउनुको असह्य पीडा थियो, अर्कोतिर बलिउडको ठुलो फिल्ममार्फत डेब्यू गर्ने दबाब,’ उनले भनिन्, ‘त्यो समय म भावनात्मक रूपमा पूर्णतः शून्य थिएँ । फिल्म सफल भए पनि धेरैको आलोचना र आमासँगको तुलनाले मलाई गहिरो डिप्रेसनमा धकेल्यो ।’ उनले आफूलाई कयौं महिनासम्म कोठामै थुनेर राखेको र थेरापीको सहारा लिनुपरेको समेत स्वीकार गरेकी छन् ।
‘मफ्र्ड’ तस्बिर र प्रविधिको कुरूप अनुहार अन्तर्वार्ताका क्रममा उनले सामाजिक सञ्जालमा हुने प्रविधि प्रयोग गरी बिगारिएका तस्बिरका कारण आफूले भोगेको साइबर शोषणको विषयमा पनि कडा टिप्पणी गरेकी छन् । जाह्नवीका अनुसार, कतिपय मानिसहरूले उनका तस्बिरहरूलाई अश्लील तरिकाले सम्पादन गरेर इन्टरनेटमा फैलाइदिँदा उनले चरम मानसिक असुरक्षा महसुस गरेकी थिइन् ।
‘म सानी हुँदादेखि नै मेरा तस्बिरहरू गलत रूपमा प्रयोग गरिए । किशोर अवस्थामा यस्ता कुराले आत्मविश्वास नै समाप्त पारिदिन्छ,’ उनले भनिन् । प्रविधिको विकाससँगै ‘डिपफेक’ र ‘मर्फिङ’ ले महिला कलाकारहरूको गरिमामा आँच पु¥याइरहेकोमा उनले चिन्ता व्यक्त गरिन् ।
जाह्नवीको यो खुलासाले बलिउडमा ‘नेपो–किड्स’ ले सजिलै सफलता पाउँछन् भन्ने भाष्यलाई मात्र चुनौती दिएको छैन, बरु सेलिब्रिटीहरूले पनि सामान्य मानिस झैं गम्भीर मानसिक र सामाजिक समस्या झेल्नुपर्छ भन्ने यथार्थलाई छर्लंग पारेको छ ।