नयाँ स्वरूपमा ‘माइतीघर’

नेपालमा निजी क्षेत्रको लगानीमा बनेको पहिलो चलचित्र ‘माइतीघर’मा समावेश शीर्ष गीत ‘प्राणभन्दा प्यारो माइतीघर’ अहिलेको पुस्तामा पनि लोकप्रिय छ । भारतीय गायिका आशा भोस्लेले स्वर तथा संगीतकार जयदेवको सिर्जना उक्त गीतलाई किरण खरेलले रचना गरेका हुन् ।

अहिले यो गीतको चर्चा निकै चुलिएको छ । चुलिनुको कारण चाहिँ ‘माइतीघर’ फिल्ममा यो गीतलाई नयाँ स्वरूपमा तयार पारिएको र त्यसको मनोहर छायांकनले पनि हो । नाम उही, गीत उही ‘माइतीघर’ राखिए पनि नयाँ परिवेशमा पुरानो मर्म रहनेगरी तयार पारिएको निर्माता रोहित अधिकारीले बताएका छन् ।

यो गीतमा अर्की भारतीय गायिका सञ्जिवनीले स्वर दिएकी छन् । गीतमा गायिकाको स्वर मात्र नयाँ थपिएको अधिकारीले बताए । यो गीतले नै चलचित्रको कथा अघि बढाउने भएकाले यसलाई आकर्षक बनाउन कुनै कसर नछाडिएको अधिकारीले बताएका छन् । यो गीत छायाँकनका लागि ५० लाखभन्दा बढी खर्च गरिएको बजार हल्लालाई भने उनले अस्वीकार गरे ।

‘पुरानो गीत जति कालयजयी छ, त्यसको मर्मलाई कायम राख्दै नयाँ पुस्तासम्म पुर्‍याउने उद्देश्यले यसलाई फिल्ममा समावेश गरिएको हो,’ उनले भने । निर्माता अधिकारीले उक्त गीतमा श्रव्यदृश्य (भिडिओ) बनाउने मध्येबाट उत्कृष्टलाई रु पाँच लाख पुरस्कार राशि प्रदान गरिने घोषणासमेत गरेका छन् ।

‘गीतको श्रव्यदृश्यमा राम्रो नृत्य गरेर हामीलाई पठाउनेमध्ये एक जनाले चलचित्र सार्वजनिक रूपमा प्रदर्शन हुनु अगाडि प्रतियोगिताको विजेता घोषणा गरी पुरस्कार पाउनुहुनेछ । प्रतियोगितामा सहभागी हुन ४० सेकेण्डदेखि २ मिनेटसम्मको श्रव्यदृश्य तयार गरेर हामीलाई पठाउनुपर्नेछ,’ उनले भने ।

मिलन तामाङको निर्देशनमा तयार भएको ‘माइतीघर’मा केदारप्रसाद घिमिरे, धीरज मगर, प्रकाश सपुत, युवराज लामा, बुद्धि तामाङ, शिशिर वाङ्देल, रजनी गुरुङ, सन्तोष शाही, फूलकुमार बमजम, सङ्गीता थापालगायत कलाकारले अभिनय रहेको छ । चलचित्र दशैँको अवसर पारेर फूलपाती (असोज १३ गते) देखि प्रदर्शन हुने निर्माण पक्षले जनाएको छ ।