कार्की आयोगको प्रतिवेदन अपूर्ण र पूर्वाग्रहीः नेकपा

काठमाडौं । नेकपा संयुक्तले पूर्वन्यायाधीश गौरीबहादुर कार्की नेतृत्वको आयोगको प्रतिवेदनलाई अपूर्ण र पूर्वाग्रही भन्दै अर्को आयोग गठन गरेर भदौ २३ र २४ गतेका घटनाको जाँचबुझ गर्न माग गरेको छ । पार्टीका कार्यवाहक अध्यक्ष घनश्याम भुसालले जारी गरेको विज्ञप्तिमा वर्तमान बहालवाला न्यायाधीशको अध्यक्षतामा शक्तिशाली छानबिन आयोग बनाउनुपर्ने माग गरिएको छ ।

पार्टीको हालै सम्पन्न राष्ट्रिय सम्मेलन आयोजक कमिटीको बैठकले विभिन्न ११ बुँदे समसामयिक प्रस्तावहरू पारित गरेको विज्ञप्तिमा उल्लेख छ । बैठकले वि.सं. २०४८ देखिका उच्चपदस्थ कर्मचारी र राजनीतिक व्यक्तिहरूको सम्पत्ति छानबिन गर्न उच्चस्तरीय समिति गठनको माग गरेको छ ।

यस्तै, मध्यपूर्वको द्वन्द्वका कारण सिर्जित ऊर्जा संकट समाधान गर्न र बजारमा व्याप्त महँगी नियन्त्रण गर्न सरकारलाई आग्रह गरिएको छ ।

पार्टीले इरान, प्यालेस्टाइन, लेबनान, इराक र यमनमा भइरहेको आक्रमणको कडा आलोचना गरेको छ । अमेरिकी र इजरायली कदमलाई साम्राज्यवादी भन्दै पार्टीले यस्ता आक्रमण तत्काल रोक्न माग गरिएको छ। भेनेजुएलाका राष्ट्रपति निकोलस मदुरो दम्पतीको अपहरण प्रयासको निन्दा गर्दै पार्टीले उनीहरूको बिना सर्त रिहाइको माग समेत गरेको छ ।

पार्टीले आत्मनिर्भर अर्थतन्त्रको निर्माण, रोजगारी प्रवद्र्धन र ऊर्जा संकट समाधानका लागि नेपाली भान्सालाई विद्युतीकरण गर्ने कार्ययोजना ल्याउन सरकारलाई दबाब दिएको छ । असमान सन्धि सम्झौताहरू खारेज गर्नुपर्ने र बहुध्रुवीय विश्व व्यवस्था अनुसारको आर्थिक प्रणाली विकास गर्नुपर्नेमा पार्टीले जोड दिएको छ । नेकपा संयुक्तले आगामी असोजभित्र जिल्ला तहमा संगठन विस्तार गरी मंसिरमा राष्ट्रिय सम्मेलन गर्ने निर्णय समेत गरेको छ ।