अस्पताललाई छैन आइतबार बिदा

काठमाडौं । स्वास्थ्य तथा जनसंख्या मन्त्रालयले सार्वजनिक बिदाका दिन पनि स्वास्थ्य सेवा अवरुद्ध हुन नदिने प्रस्ट पारेको छ । मन्त्रालयले बिदामा समेत देशभरका अस्पताल तथा स्वास्थ्य संस्थालाई सेवा निरन्तर सञ्चालन गर्न निर्देशन दिएको छ । मन्त्रालयका सहप्रवक्ता डा. समीरकुमार अधिकारीले उपचार सेवा प्रवाहमा कुनै अवरोध नआओस् भन्ने उद्देश्यले आवश्यक प्रबन्ध मिलाउन सबै स्वास्थ्य संस्थालाई निर्देशन दिइएको जानकारी दिए ।
उनले आइतबार सरकारले सार्वजनिक बिदा दिए पनि स्वास्थ्य संस्था अत्यावश्यक सेवा भएकोले सेवा नरोक्न निर्देशन दिइएको बताए । यसअघि मन्त्रीपरिषद्को निर्णय अनुसार गत २२ चैतमा राजपत्रमा सूचना प्रकाशित गरी शनिबार र आइतबार लगातार दुई दिन सार्वजनिक बिदा दिने व्यवस्था लागु गरिएको थियो । उक्त निर्णयसँगै स्वास्थ्य सेवामा असर पर्न सक्ने सम्भावनालाई ध्यानमा राखी मन्त्रालयले सेवा नियमित राख्न निर्देशन दिएको हो । उनले अस्पतालहरूले आफ्नो कार्यभार र उपलब्ध जनशक्ति मूल्याङ्कन गरी आइतबारका दिनसमेत बहिरङ्ग (ओपिडी) सेवा सञ्चालन गर्नुपर्ने उल्लेख गरे ।