महाधिवेशनको मागसहित राप्रपामा नेतृत्वको विषयमा विवाद चर्किँदै

काठमाडौ‌ ।  राष्ट्रिय प्रजातन्त्र पार्टी (राप्रपा)भित्र नेतृत्वको विषयलाई लिएर विवाद तीव्र बन्दै गएको छ । प्रतिनिधि सभा निर्वाचनमा पार्टीले भोगेको पराजयको समुचित समीक्षा हुन नसकेको भन्दै पार्टीका महामन्त्रीसहित ११ जना नेताहरूले असन्तुष्टि व्यक्त गरेका छन् ।

उनीहरूले पार्टी अध्यक्ष राजेन्द्र लिङ्देन ले नेतृत्वको विकल्प खोज्नुपर्ने आवश्यकता औंल्याउँदै एक साताभित्र केन्द्रीय महाधिवेशनको मिति घोषणा गर्न आग्रह गरेका छन् । 
उक्त समूहले तीन बुँदे माग सार्वजनिक गर्दै सन्तुलित र विश्वसनीय वातावरणमा महाधिवेशन सम्पन्न गर्न निष्पक्ष व्यक्तिको संयोजकत्वमा महाधिवेशन आयोजक समिति गठन गर्नुपर्ने बताएका छन् । त्यस्तै, नेतृत्व चयन प्रक्रियालाई समयमै अगाडि बढाउन एक हप्ताभित्र महाधिवेशनको मिति तोक्नुपर्नेमा जोड दिएका छन्।

यसका साथै, एकता महाधिवेशनपछिका गतिविधिहरूमा पार्टीको विधान र अनुशासन विपरीत भएका कामकारबाहीहरूको निष्पक्ष छानबिन गरी त्यसको प्रतिवेदन आगामी महाधिवेशनमा प्रस्तुत गर्न छानबिन समिति गठन गर्नुपर्ने माग पनि उहाँहरूले अघि सारेका छन् ।

हाल देखिएको यो विवादले राप्रपाभित्र नेतृत्व परिवर्तनको बहस तीव्र बन्दै गएको संकेत गरेको छ। मागहरू समयमै सम्बोधन नभए पार्टीभित्र थप मतभेद गहिरिने सम्भावना रहेको राजनीतिक वृत्तमा आकलन गरिएको छ।