जितालीको ‘शास्त्रीय छन्दका छाँगा’ विमोचित

वरिष्ठ कवि तथा गीतकार डा बमबहादुर थापा ‘जिताली’को कवितासंग्रह ‘शास्त्रीय छन्दका छाँगा’ विमोचन गरिएको छ । राष्ट्र, राष्ट्रियता, प्रकृतिप्रेमलाई कवितामार्फत प्रस्तुत गरिएको उक्त कवितासङ्ग्रहको आज लमजुङका प्रतिनिधिसभा सदस्य धर्मराज केसी, पूर्वराजदूत प्राडा जयराज आचार्य, नेपाली शिक्षा परिषद्का अध्यक्ष रमा शर्मा, मस्र्याङ्दी वाङमय प्रतिष्ठानका अध्यक्ष विजयराज न्यौपानेले संयुक्त रूपमा विमोचन गरे ।
कार्यक्रममा लमजुङका सांसद केसीले नेपाली भाषा, साहित्य र वाङ्मयको विकासमा कवि जितालीले खेलेको योगदान महत्त्वपूर्ण रहेको बताए । उनले साहित्यिक क्षेत्रको विकासका लागि सरकारले सकारात्मक काम गर्ने उल्लेख गरे ।
पूर्वराजदूत डा आचार्यले डा जितालीको कविता सुस्वादयुक्त, रसिला, कसिला र पोसिला भएको बताए । कविता संग्रहको समीक्षा गर्दै पद्मकन्या क्याम्पसका उपप्राध्यापक ज्ञाननिष्ठ ज्ञवालीले कवितासङ्ग्रहभित्र ‘देशप्रेम’, ‘भाषा प्रेम’, ‘छन्द प्रेम’, ‘प्रकृतिप्रेम’, ‘युवाप्रेम’ भाव झल्किएको बताए ।
लामो समय रेडियो नेपालमा जागिर गरेर अवकाश हुनुभएका डा जितालीको ‘वसुन्धरा’, ‘धोती न टोपी’, ‘छत्तिस छन्दका छहरा’, ‘आलुमूला’, ‘आँसुका धारा’, ‘जहाँ छन् बुद्धका आँखा’जस्ता दर्जनभन्दा बढी कृति प्रकाशित छन् ।