कांग्रेस संसदीय दलको नेता चयनका लागि तोकियो निर्वाचन

काठमाडौं । कांग्रेसले संसदीय दलको नेता चयनका लागि आगामी वैशाख ४ गते निर्वाचन गर्ने भएको छ । निर्वाचन समितिका संयोजक एवं सहमहामन्त्री प्रकाश रसाइलीका अनुसार वैशाख २ गते निर्वाचन कार्यतालिका सार्वजनिक हुनेछ ।  
निर्वाचन समितिले वैशाख २ गते कार्यतालिका ल्याउने र ४ गते निर्वाचन सम्पन्न हुने भन्दै उनले भने, ‘सर्वसम्मत नभएको खण्डमा प्रतिस्पर्धाकै माध्यमबाट दलको नेता छानिनेछ ।’ 
प्रतिनिधिसभामा कांग्रेसका १८ निर्वाचित र २० समानुपातिक गरि ३८ जना सांसद छन् । कांग्रेसमा दलको नेताका लागि पूर्वसहमहामन्त्रीहरू अर्जुननरसिंह केसी, भीष्मराज आङ्देम्बे, सांसदहरू मोहन आचार्यको नाम चर्चामा छ । युवा सांसद निश्कल राई र कांग्रेसकी एक मात्र निर्वाचित सांसद बासना थापालाई दलको नेता बनाउनुपर्ने मत पनि कांग्रेसभित्र देखिएको छ । 
यसैबीच, संसदीय दलको नेताका आकांक्षी रहेका सांसद अर्जुननरसिंह केसीले दलको नेता चयनका लागि स्पष्ट मापदण्ड बनाउनुपर्ने बताएका छन् । सामाजिक सञ्जाल ‘एक्स’ मार्फत आफ्नो धारणा सार्वजनिक गर्दै उनले प्रक्रियामा ढिलाइ नगर्न समेत आग्रह गरेका छन् ।
केसीले दलको नेता छान्न ‘को’ भन्दा पनि ‘किन’ र ‘कस्तो’ भन्ने मापदण्ड आवश्यक रहेको बताएका छन् । उनले भनेका छन्, ‘मेरो कारणले ढिलाइ भयो भन्ने वा नाता र नेताका भास्य पनि बाहिर छ्याप्छ्यप्ती आएका छन् । यो असत्य र भ्रामक हो । मैले पार्टीभित्र र सार्वजनिक रूपमा नै भनिनै सकेको छु– सहमतिको मापदण्ड बनाऔं र सकेसम्म सर्बसम्मति गरौं। मेरो पूर्ण समर्थन हुनेछ ।’
प्रतिनिधिसभामा रहेका ६ मध्ये ५ दलले दलको नेता चयन गरिसकेका छन् ।