अफगानिस्तान भूकम्पमा १,४०० भन्दा बढीको मृत्यु, मानवीय संकट गहिरिँदै

अफगानिस्तानको कुनर प्रान्त केन्द्रबिन्दु भएको ६.० म्याग्निच्युडको भूकम्पले २०८२ भदौ १५ गते (३१ अगस्ट २०२५) आइतबार राति पूर्वी क्षेत्रलाई ठूलो क्षति पुर्‍यायो । नूर्गल जिल्ला आसपास सबैभन्दा बढी प्रभावित भए भने कम्पन राजधानी काबुल र छिमेकी पाकिस्तानसम्म महसुस गरिएको थियो ।

यस विपद्‌मा कम्तीमा १,४०० जनाको मृत्यु भएको छ, करिब ३,५०० जना घाइते भएका छन्, र ८,००० भन्दा बढी घर पूर्ण रूपमा ध्वस्त भएका छन् । यस घटनाले जनधन दुवैमा गम्भीर संकट सिर्जना गरेको छ ।

उद्धार कार्य तीव्र गतिमा भइरहेको छ तर पहाडी भूभाग, पहिरो र कमजोर पूर्वाधारका कारण सहयोग पुर्‍याउन कठिनाइ बढेको छ । प्रभावित क्षेत्रमा खाद्य, औषधि, आश्रय र उपचार सामग्रीको अभाव छ ।

अन्तर्राष्ट्रिय समुदाय—ब्रिटेन, भारत, चीन, यूएई, इरान र युरोपियन युनियनलगायतले सहयोग घोषणा गरेका छन्, तर सीमित बजेटका कारण राहत कार्य अपेक्षित स्तरमा पुग्न सकेको छैन। तत्काल मानवीय सहयोग र दीर्घकालीन पुनर्निर्माण अपरिहार्य बनेको छ ।

तस्विर : एएफपी