माइकल ज्याक्सनको बायोेपिक

विश्व संगीत आकाशका कहिल्यै नअस्ताउने तारा हुन् माइकल ज्याक्सन । त्यसै पनि निधनको डेढ दशक बितिसक्दा पनि संगीत जगत अझै उनको जादु अनुभव गर्छ । यतिबेला मनोरञ्जन बजारमा ‘किङ अफ पप’ फेरि एकपटक सशक्त रूपमा चर्चामा छन्, जसको मुख्य कारण हो, उनको जीवनमा आधारित प्रतिक्षित बायोपिक । 
हलिउडको लायन्सगेट स्टुडियोले निर्माण गरेको फिल्म ‘माइकल’ आगामी साता अप्रिल २४ मा विश्वव्यापी रूपमा प्रदर्शनमा आउँदैछ । सार्वजनिक प्रदर्शनअघि नै यो फिल्मले अग्रिम बुकिङ र सामाजिक सञ्जालको चर्चामा नयाँ कीर्तिमान कायम गरिसकेको छ । हलिउडका सिद्धहस्त निर्देशक एन्टोनी फुक्वाले निर्देशन गरेको यो फिल्ममा माइकलको भूमिकामा उनका आफ्नै भतिजा जाफर ज्याक्सन देखिएका छन् । जाफरको लुक्स र नृत्य शैली दुरुस्तै माइकलसँग मिलेका कारण पनि फिल्मप्रति दर्शकको कौतूहलता चरमचुलीमा पुगेको हो ।

करिब १५५ मिलियन डलरको ठूलो बजेटमा बनेको यो फिल्मले सन् १९५८ अगस्ट २९ मा अमेरिकाको इन्डियाना राज्यमा जन्मिएका एक साधारण अश्वेत बालक कसरी विश्वचर्चित पप आइकन बने भन्ने कथा फिल्मले भन्छ । सन् १९६० को दशकमा आफ्ना दाजुहरूसँग मिलेर ज्याक्सन फाइभ ब्यान्डबाट सांगीतिक यात्रा सुरु गरेका माइकलले सन् १९७० र ८० को दशकमा एकल गायनमार्फत संसारलाई नै नचाए । उनको सन् १९८२ मा सार्वजनिक भएको ‘थ्रिलर’ आज पनि संसारमा सर्वाधिक बिक्री हुने एल्बमको रूपमा कीर्तिमानी छ । ‘बिली जिन’, ‘ब्याड’, ‘ब्ल्याक अर ह्वाइट’ जस्ता कालजयी गीत र उनको सिग्नेचर नृत्य ‘मूनवाक’ ले उनलाई केवल गायक मात्र नभई एक सांस्कृतिक क्रान्तिकारीका रूपमा स्थापित ग¥यो । उनले आफ्नो करियरमा १३ वटा ग्रामी अवार्ड जिते भने ८० को दशकमा रिलिज भएका उनका गीतहरूले रंगभेदको पर्खाल भत्काउँदै एमटीभी जस्ता प्लेटफर्ममा अश्वेत कलाकारको पहुँच पु¥याएका थिए ।
फिल्म ‘माइकल’ मा कलाकारहरूको छनोट निकै रोचक छ । माइकलको भूमिकामा जाफर ज्याक्सन देखिँदा उनका पिता जो ज्याक्सनको भूमिकामा कोलमन डोमिंगो र आमा क्याथरिन ज्याक्सनको भूमिकामा निया लङले अभिनय गरेका छन् । फिल्मले माइकलको सफलताको शिखर मात्र नभई उनको जीवनका अँध्यारा र विवादित पक्षहरूलाई पनि नढाँटी प्रस्तुत गर्ने दाबी गरेको छ । उनले भोगेको एक्लोपन, उनको स्वास्थ्य समस्या र सन् १९९० को दशकमा लागेका बाल यौन दुव्र्यवहारका गम्भीर आरोपहरूलाई फिल्मले कसरी चित्रण गर्छ भन्नेमा धेरैको ध्यान केन्द्रित छ । यी विवादहरूले उनको करियरलाई निकै प्रभावित पारे पनि उनका प्रशंसकहरूले उनलाई सधैं माया गरिरहे ।
सन् २००९ जुन २५ मा लस एन्जलसस्थित आफ्नै निवासमा मृत भेटिएका  ५० वर्षीय माइकल ज्याक्सनको निधन अझै रहस्यमय मानिन्छ । उनको मृत्यु प्रोपोफोल नामक औषधिको ओभरडोजका कारण भएको ठहर गरियो, जसमा उनका निजी चिकित्सक डा. कोनराड मरेलाई दोषी मान्दै जेल सजाय समेत भयो । उनको निधनपछि पनि उनीसँग जोडिएका विवाद र डकुमेन्ट्रीहरूले चर्चा पाइरहे, तर अहिले बन्न लागेको बायोपिकले उनको वास्तविक मानवीय संवेदनालाई पर्दामा ल्याउने अपेक्षा गरिएको छ । फिल्मको ट्रेलर सार्वजनिक भएपछि यसले धेरै भ्युज पाएर डिजिटल प्लेटफर्ममा हलचल मच्चाएको थियो । प्रदर्शनीअघि नै यस फिल्मले संगीत र सिनेमा दुवै विधाका पारखीहरूलाई एक ठाउँमा ल्याएको छ । अमेरिकादेखि नेपालसम्मका दर्शकहरू पप सम्राटको त्यो जादुमयी मूनवाक र भावुक जीवनकथा फेरि एकपटक ठूलो पर्दामा हेर्न आतुर छन् ।