अमेरिकी कलमजीविलाई सुरक्षा कवच

पेन अमेरिकाले अमेरिकामा लेखकहरूविरुद्ध बढ्दो दुव्र्यवहार र धम्कीको घटनालाई ध्यानमा राख्दै नयाँ सुरक्षा कार्यक्रम सुरु गरेको छ । यूएस सेफ्टी प्रोग्राम नाम दिइएको यो पहलमार्फत लेखक, चित्रकार र अनुवादकहरूलाई सुरक्षा सम्बन्धी तालिम, स्रोत र सहयोग उपलब्ध गराइने जनाइएको छ ।
पेन अमेरिका एक अन्तर्राष्ट्रिय साहित्यिक तथा मानवअधिकार संस्था हो, जसले अभिव्यक्ति स्वतन्त्रताको संरक्षणका लागि काम गर्छ । यसले लेखक, पत्रकार र बौद्धिक व्यक्तिहरूको अधिकारका लागि वकालत गर्छ, सेन्सरशिपको विरोध गर्छ र खतरा सामना गरिरहेका सर्जकहरूलाई सहयोग तथा सुरक्षा कार्यक्रमहरू प्रदान गर्दछ ।
संस्थाकी सह–प्रमुख कार्यकारी अधिकृत क्लारिस रोसाज शरीफ का अनुसार पछिल्लो समय साहित्यिक क्षेत्रमा संलग्न व्यक्तिहरूले अनलाइन र पुस्तक विमोचनजस्ता कार्यक्रमहरूमा निरन्तर गालीगलौज, धम्की र दबाब झेल्नुपरेको छ । यस्तो अवस्थामा लेखकहरूले आफ्नो विचार व्यक्त गर्ने कि व्यक्तिगत सुरक्षा रोज्ने भन्ने कठिन परिस्थितिमा नपरोस् भन्ने उद्देश्यले कार्यक्रम ल्याइएको उनले बताइन् ।
डिजिटल सुरक्षा कार्यक्रमकी निर्देशक भिक्टोरिया भिल्कले करिब एक दशकअघि पत्रकारहरूमा देखिएको यस्तो समस्या अहिले लेखक र शिक्षकहरूमा पनि फैलिएको बताइन् । माइया कोबाबे, जोन इभिसन र जर्ज एम जोनसन जस्ता लेखकहरूले आफ्ना कृतिहरूका कारण धम्की, दुव्र्यवहार र कतिपय अवस्थामा शारीरिक आक्रमणसमेत झेल्नुपरेको अनुभव सार्वजनिक गरिसकेका छन् ।
लेखिका एश्ले होप पेरेजले आफ्नो उपन्यास ‘आउट अफ डार्कनेस’ विवादमा परेपछि आफूले घृणायुक्त म्यासेज र धम्कीपूर्ण फोन कलहरू पाएको र त्यसपछि व्यक्तिगत इमेल र फोन नम्बर हटाउन बाध्य भएको बताएकी छन् ।
सुरक्षा कार्यक्रमका लागि ह्याचेट बुक ग्रुप, म्याकमिलन पब्लिशर्स र पेन्गुइन ¥यान्डम हाउस लगायत प्रकाशकहरूको सहयोगमा करिब १० लाख अमेरिकी डलर संकलन गरिएको छ । आगामी दिनमा जोडी पिकोल्ट, जेनिफर इगन र ली चाइल्ड जस्ता लेखकहरूले आफ्ना भावी कृतिका पात्रहरूको नाम लिलाममार्फत उठ्ने रकम पनि यसै कार्यक्रमलाई सहयोग गर्न प्रयोग गर्ने जनाइएको छ ।
डेभिड शेल्लीले हाल अमेरिकामा लेखकहरूको सुरक्षामाथि पहिलेभन्दा बढी खतरा देखिएको उल्लेख गर्दै यस्तो कार्यक्रम अत्यावश्यक भएको बताएका छन् ।