लेटरप्याड दुरुपयोगमा पूर्णबहादुरसँग स्पष्टीकरण माग

काठमाडौं । प्रतिनिधिसभा निर्वाचनमा लज्जास्पद पराजयपछि फुर्सदिला बनेका  कांग्रेस नेताहरूले पार्टीको आन्तरिक कलहलाई फेरि चर्को बनाउने संकेत गरेका छन् । पार्टीको लेटरप्याड दुरुपयोगमा केन्द्रीय अनुशासन समितिले पूर्वउपसभापति पूर्णबहादुर खड्कासँग स्पष्टीकरण माग गरेको छ । केन्द्रीय कार्यालय सानेपामा बसेको अनुशासन समितिको बैठकले बुधबार उनलाई सात दिनभित्र स्पष्टीकरण दिन निर्देशन दिएको हो ।
समितिका संयोजक तारामान गुरुङको संयोजकत्वमा बसेको बैठकले खड्काले पार्टीको नक्कली लेटरप्याड प्रयोग गरी अनधिकृत वक्तव्य जारी गरेको आरोप लगाएको छ । ‘गत चैत १८ गते नै सचेत गराउँदागराउँदै पुनः चैत ३० गते पार्टीको नक्कली लेटरप्याड प्रयोग गरी आफूसँग नभएको जिम्मेवारी उल्लेख गरेर विज्ञप्ति जारी गर्नु विधानविपरीत छ,’ विज्ञप्तिमा भनिएको छ ।  विधान २०१७ (संशोधनसहित) को धारा ३४ को उपधारा ८ (घ) बमोजिम खड्कालाई स्पष्टीकरण सोधिएको छ ।
विशेष महाधिवेशनले चयन गरेको नयाँ कार्यसमितिलाई निर्वाचन आयोगले मान्यता दिइसकेपछि पनि खड्काले कार्यवाहक सभापतिको हैसियतमा पार्टीको लेटरप्याडमा विज्ञप्ति जारी गर्दै आएका थिए । 
यता, खड्काले अनुशासन समितिको निर्णयलाई ‘हास्यास्पद र अर्थहीन’ भएको टिप्पणी गरेका छन् । उनले आफूले प्रयोग गरेको लेटरप्याड सक्कली रहेको दाबी गर्दै वर्तमान कार्यसमितिकै वैधानिकतामाथि प्रश्न उठाएका छन् । ‘अवैधानिक महाधिवेशन र त्यसबाट निर्वाचित कार्यसमितिले बनाएका संरचनाले स्पष्टीकरण सोध्नु निरर्थक र अर्थहीन छ,’ खड्काले भनेका छन् । उनले विशेष महाधिवेशन र त्यसपछिको कार्यसमितिलाई अवैध ठहर गर्दै आफू न्यायका लागि सर्वोच्च अदालत पुगेको समेत स्मरण गराएका छन् । 
विशेष महाधिवेशनबाट सुरु भएको कांग्रेसभित्रको आन्तरिक विवाद प्रतिनिधिसभा निर्वाचनपछि झन् चर्किएको छ । अनुशासन समितिले निर्वाचनका क्रममा भएका अनुशासन उल्लंघनका उजुरी दिने समय सीमालाई २०८३ वैशाख मसान्तसम्म थप गर्ने निर्णय पनि गरेको छ । 
संस्थापन पक्ष अनुशासनको डण्डा चलाएर इतर पक्षलाई साइजमा राख्ने र वार्ता गरेर सहमतिमा ल्याउने दुवै बाटोमा एकसाथ अघि बढेको छ । अनुशासन समितिले स्पष्टीकरण सोधेलगत्तै कांग्रेस केन्द्रीय कार्यसम्पादन समिति बैठकले भने सभापति गगन थापालाई असन्तुष्ट पक्षसँग संवाद गर्ने जिम्मेवारी दिएको छ । १५औं महाधिवेशनको तयारीमा पार्टी रहेकाले महाधिवेशन गराउनेगरी असन्तुष्ट पक्षसँग छलफल गर्ने जिम्मेवारी सभापति थापालाई दिइएको प्रवक्ता देवराज चालिसेले बताए । ‘जो संस्थापन हो असन्तुष्ट पक्षसँग संवाद गर्ने उसैको जिम्मेवारी हो,’ प्रवक्ता चालिसेले भने, ‘त्यसकारण पार्टीका सभापतिलाई हाम्रा अग्रज नेता, पूर्व पदाधिकारीसँग संवाद गर्ने र समयमै महाधिवेशन सम्पन्न गर्नका लागि समन्वय गर्नका लागि पार्टी सभापति गगनकुमार थापाजीलाई जिम्मेवारी दिएका छौं ।’ 
त्यस्तै, कांग्रेसले पार्टीको संगठन व्यवस्थित गर्न तीन नेतालाई जिम्मेवारी दिएको छ । पार्टीको केन्द्रीय कार्यसम्पादन समितिको बैठकले महामन्त्री गुरुराज घिमिरेको संयोजकत्वमा सहमहामन्त्री बहादुरसिंह लामा र मुक्ताकुमारी यादवलाई जिम्मेवारी तोकेको हो ।