विवादास्पद हिट बन्ने तयारीमा ‘माइकल’

पप सम्राट माइकल ज्याक्सनको असाधारण तर विवादास्पद जीवनमा आधारित फिल्म माइकल आउँदो शुक्रबारबाट नेपालमा रिलिज हुने तयारीमा छ । नेपाली दर्शकका लागि बुधबार नै अग्रिम शो आयोजन गरिँदैछ । यस्ता अग्रिम शो सबै फिल्मका लागि आयोजन गरिँदैनन् । यसको अर्थ, नेपालमा समेत यो फिल्मबारे चासो छ । फिल्म निकै लोकप्रिय हुने अनुमान गरिएको छ । तर के यसले उनको जीवनको सम्पूर्ण कथा देखाउला त ? केही आलोचकहरूको प्रश्न छ ।
यसअघि रिलिज भएको क्वीन नामक ब्यान्डका मुख्य गायक फ्रेडी मर्करीको जीवनीमा बनाइएको ‘बोहेमियन ¥याप्सोडी’को निर्माण पनि निकै सास्ती थियो । एड्स रोग लागेर दिवंगत भएका फ्रेडीको सो फिल्म निकै हिट भएको थियो । तर निर्माणका बेला निकै विवाद हुँदा सुरुमा मुख्य भूमिकामा रहने भनिएका साचा बारोन कोहेन बाहिरिए भने निर्देशक ब्रायन सिंगरलाई पनि हटाइयो । तर पछि जब फिल्म रिलिज भयो, बक्स अफिसमा ९०० मिलियन डलरभन्दा बढी कमायो नै, साथमा चार ओस्कारसमेत हात पा¥यो ।
¥याप्सोडीको सफलतापछि निर्देशक ग्राहम किङले २०१९ मा नै माइकल ज्याक्सनमाथि फिल्म बनाउँछु भनेर घोषणा गरेका थिए । तर यो परियोजनामा एउटा ठूलो चुनौती थियोः ज्याक्सनमाथि बाल यौन दुरुपयोगको आरोप लागेको थियो । ज्याक्सनको सम्पत्ति व्यवस्थापन गर्ने पक्षका वकिलहरू माइकल ज्याक्सन निर्दोष रहेकामा विश्वस्त थिए र अदालतले पनि उनलाई दोषी करार गर्न सकेको थिएन ।
तर पनि ती आरोपहरू उनको जीवनकथाको हिस्सा बनेका छन् । यसले उनको जीवनलाई ठूलो बजेटको हलिउड फिल्ममा रूपान्तरण गर्न जटिल बनाएको थियो । यद्यपि, अहिलेको लोकप्रियता हेर्दा यो फिल्म पनि ठूलो हिट हुने अपेक्षा गरिएको छ । उद्योग विश्लेषकहरू भन्छन्– ‘माइकल’ ‘बोहेमियन ¥याप्सोडी’भन्दा पनि सफल हुन सक्छ । तर जब फिल्म सुटिङका लागि निस्कियो, निर्देशकमा किङ थिएनन् । उनलाई एन्टोनी फुकाले विस्थापित गरिसकेका थिए ।
सन् २००९ मा औषधिको ओभरडोजका कारण ५० वर्षको उमेरमा ज्याक्सनको मृत्यु भएयता उनको लोकप्रियता झन् बढेको देखिन्छ । स्पोटीफाईमा हाल उनका ६४.८ मिलियन मासिक श्रोता र ४०.५ मिलियन फलोअर छन् । यो भनेको विश्वका शीर्ष २७ कलाकारमध्ये एक हुनु हो ।
उनको जीवन र संगीतमा आधारित माइकल ज्याक्सन वन नामक कार्यक्रम २०१३ देखि लस भेगासमा चलिरहेको छ । साथै एमजे द म्युजिकल नामक टोनी पुरस्कार विजेता गीतिनाटक सन् २०२२ देखि ब्रोडवेमा मञ्चन भइरहेको छ । नयाँ फिल्म यसै ‘माइकल ज्याक्सन उद्योग’ को अर्को कडी हुनेछ ।
आखिर ज्याक्सन अझै पनि किन लोकप्रिय छन् ? संगीत समीक्षक लुडोभिक हन्टर टिल्नेका अनुसार यसका कारण धेरै छन् । उनको अपराध प्रमाणित गर्ने ठोस कानूनी प्रमाणको अभाव, छवि पुनःस्थापना गर्ने जनसम्पर्क रणनीति र उनी स्वयं पनि पीडित भएको धारणा । साथै, उनी एक उत्कृष्ट गायक, नर्तक र मनोरञ्जनकर्ताको प्याकेज नै भएका कारण अहिले पनि उनी उत्तिकै लोकप्रिय छन् । यो फिल्ममा कुनै विवाद नगाँसिएको हुनाले फिल्म सफा रहेको केहीको भनाइ छ । द हलिउड रिपोर्टरका अनुसार, १९९४ को सम्झौताका कारण जोर्डन चान्डलरको विषय फिल्ममा देखाउन मिलेन । त्यसपछि सन् २०२५ मा २२ दिन  पुनःछायांकन गरियो, जसमा करिब १०–१५ मिलियन डलर खर्च भयो । 
यो फिल्म सुपरहिट भएको खण्डमा यसको दोस्रो भाग बनाउने तयारीसमेत भइरहेको छ । यसरी, ‘माइकल’ एउटा भव्य तर विवादबाट टाढा राखिएको फिल्मले दर्शक तान्ने सम्भावना प्रबल छ । फिल्मलाई एन्टोनी फुकाले निर्देशन गरेका छन् । निर्देशक फुका थ्रिलर विधाका उम्दा फिल्म बनाउन पोख्त मानिन्छन् । उनले ‘इक्वालाइजर’का तीन वटै शृंखला, ‘ट्रेनिङ डे,’ ‘टियर्स अफ द सन,’ ‘सूटर्स’जस्ता फिल्म निर्देृशन गरिसकेका छन् ।