रास्वपाको ध्यान प्रदेश र  स्थानीय तह निर्वाचनमा

काठमाडौं । गत फागुन २१ को प्रतिनिधिसभा निर्वाचनमा अभूतपूर्व सफलता हासिल गर्दै राष्ट्रिय राजनीतिमा शक्तिशाली बनेर उदाएको राष्ट्रिय स्वतन्त्र पार्टी अब प्रदेश र स्थानीय तहको आगामी निर्वाचनमा केन्द्रित भएको छ । वनस्थलीस्थित पार्टी केन्द्र्रीय कार्यालयमा आइतबार बसेको पार्टी सचिवालय बैठकले संघीय उपलब्धिलाई तल्लो तहसम्म विस्तार गर्ने स्पष्ट संकेत दिएको हो ।
पार्टीले पहिलोपटक प्रदेश र स्थानीय तहको चुनावमा प्रतिस्पर्धा गर्न लागेकाले संगठन विस्तार र संरचना सुदृढीकरणलाई प्राथमिकतामा राखेको छ । सोहीअनुसार बैठकले वैशाख १५ गतेदेखि देशभर जिल्ला अधिवेशन सुरु गर्ने निर्णय गरेको छ । यसलाई आगामी निर्वाचनको आधार निर्माणका रूपमा हेरिएको छ ।
पार्टीका प्रवक्ता मनिष झाले संगठनात्मक तयारीलाई प्राथमिकता दिँदै रास्वपा चुनावी मोडमा प्रवेश गरिसकेको संकेत गरे । उनले भने, ‘प्रत्यक्ष निर्वाचित सांसद नभएका निर्वाचन क्षेत्रमा समानुपातिकतर्फबाट निर्वाचित सांसदहरूलाई जिम्मेवारी तोक्ने निर्णय गरेका छौं । यसले सबै क्षेत्रमा संगठन विस्तारमा सहयोग पु¥याउनेछ ।’
उनका अनुसार जिल्ला र निर्वाचन क्षेत्रगत जिम्मेवारीको विस्तृत सूची सोमबार बस्ने केन्द्रीय समिति बैठकबाट अनुमोदन गरिनेछ । साथै, बैठकले केन्द्रीय सदस्यहरूबाट रिपोर्टिङ, पदाधिकारी मनोनयन, महाधिवेशन कार्यविधि मस्यौदा तथा विधान संशोधनजस्ता महत्वपूर्ण विषयमा पनि छलफल गर्नेछ ।
रास्वपाले आगामी स्थानीय तह निर्वाचनलाई लक्षित गर्दै ‘उम्मेदवार क्लब’ को अवधारणा अघि सारेको छ । यसमार्फत पालिका र वडा तहमा उम्मेदवार बन्न इच्छुक व्यक्तिहरूलाई प्रारम्भिक रूपमा दर्ता गराई छनोट प्रक्रिया व्यवस्थित गर्ने योजना छ । पार्टीभित्रैबाट सक्षम र प्रतिस्पर्धी उम्मेदवार छनोट गर्ने उद्देश्य यसको हो । पालिका तहमा उम्मेदवार बन्न इच्छुक व्यक्तिले क्लबमा नाम दर्ता गर्नुपर्नेछ ।
बैठकमा प्रवासमा रहेका नेपालीलाई विदेशबाटै मतदान अधिकार दिने विषय, पार्टीका विभिन्न विभाग तथा संरचना गठन, र पहिलो महाधिवेशनको तयारीसम्बन्धी एजेन्डामा पनि छलफल हुने बताइएको छ ।
गत फागुन २१ को प्रतिनिधिसभा सदस्यको निर्वाचनमा रास्वपाले १२५ निर्वाचन क्षेत्रमा जित हासिल गरेको थियो । एमाले अध्यक्ष केपी शर्मा ओलीलाई उनकै निर्वाचन क्षेत्र झापा–५ मा चुनौती दिँदै उम्मेदवारी दिएका बालेन्द्र शाह ५० हजारको मतान्तरले निर्वाचित भए । कोशी, मधेश, बाग्मती, गण्डकी र लुम्बिनीमा पार्टीले उल्लेख्य जनमत पाउँदा कर्णाली र सुदूरपश्चिमको नतिजा रास्वपाका लागि अझै परिश्रम गर्नुपर्ने देखिएको छ । त्यसैले पार्टीले अब जिल्ला तहमा संगठन सुदृढिकरणमा ध्यान दिने संकेत गरेको हो । 
यस्तै, प्रवासमा रहेका नेपालीलाई विदेशबाटै मतदान अधिकार दिने विषय, पार्टीका विभिन्न विभाग तथा संरचना विस्तार र पहिलो महाधिवेशनको तयारीसम्बन्धी एजेन्डामा पनि छलफल हुने जनाइएको छ ।
पार्टी सभापति रवि लामिछानेले सोमबार बस्ने केन्द्रीय समिति बैठकमा सबै सदस्यलाई अनिवार्य उपस्थित हुन निर्देशन दिएका छन्, जसले पार्टीको आन्तरिक तयारीलाई थप गम्भीर बनाएको संकेत गर्दछ ।
डीपीको ठाउँमा दीपक बोहरा 
सचिवालय बैठकले प्रवास विभाग प्रमुखमा केन्द्रीय सचिवालय सदस्य तथा सांसद दीपक बोहरालाई नियुक्त गरेको छ । यसअघि उक्त जिम्मेवारीमा रहेका उपसभापति डीपी अर्याल सभामुखमा निर्वाचित भएपछि पदबाट अलग भएका थिए । रिक्त पदमा बोहरालाई जिम्मेवारी दिइएको प्रवक्ता झाले जानकारी दिए । 
सांसद र मन्त्रीसँग लेवी लिने
पार्टीले संगठन सञ्चालनका लागि रास्वपाले मन्त्री र सांसदहरुसँग लेवी उठाउने भएको छ । सांसदहरूबाट मासिक १६ हजार रुपैयाँ र सरकारमा रहेका मन्त्रीहरूबाट १८ हजार रुपैयाँ लेबी उठाउने निर्णय सचिवालय बैठकले गरेको छ ।