कांग्रेस संसदीय दल नेता चयन शुक्रबार

काठमाडौं । नेपाली कांग्रेसले संसदीय दलको नेता चयनका लागि निर्वाचन कार्यतालिका प्रकाशन गरेको छ । निर्वाचन समितिका अनुसार नेता चयन आगामी शुक्रबार गरिनेछ ।  
निर्वाचन सिंहदरबारस्थित संसदीय दलको कार्यालयका हुनेछ । समितिले संसदीय दलको विधान अनुसार निर्वाचन कार्यतालिका तय गरिएको सोमबार जनाएको हो । 
आगामी बिहीबार दिउँसो १ बजे मतदाता नामावली प्रकाशन र  उम्मेदवारहरूको अन्तिम नामावली शुक्रबार दिउँसो साढे ३ बजे प्रकाशित गरिने कार्यतालिकामा छ । कांग्रेसमा हाल संसदीय दलको नेताका लागि  अर्जुननरसिंह केसी, मोहन आचार्य र भीष्मराज आङ्दम्बेको नाम चर्चामा छ । केसी उम्मेदवार बन्दा आचार्य उम्मेदवार नहुने सभापति गगन थापा निकट बताउँछन् । पूर्व सभापति शेरबहादुर देउवा निकट रहेका आङ्दम्बे भने पछि नहट्ने अडानमा देखिएका छन् । स्रोतकाअनुसार सभापति थापा रसुवाबाट निर्वाचित सांसद आचार्यका पक्षमा देखिएका छन् भने उपसभापति शर्माको समर्थन आङ्दम्बेलाई छ । 
वैशाख ११ गतेअघि नै सहमति जुटाउने गरी गृहकार्य पनि हुने महामन्त्री गुरुराज घिमिरेले बताए । सहमति नजुटे निर्वाचनबाटै दलको नेता चयन हुनेछन् । कांग्रेसमा हाल प्रत्यक्ष निर्वाचित १८ र समानुपातिकतर्फ २० गरी ३८ सांसद छन् । हाल प्रतिनिधिसभामा रहेका ६ मध्ये ५ दलले दलको नेता चयन गरिसकेका छन् । संसदको प्रमुख प्रतिपक्षी दल कांग्रेसले भने संसद्को पहिलो अधिवेशन सकिँदासम्म पनि दलको नेता चयन गर्न सकेको छैन । पार्टीको वैधानिकताको विवाद शुक्रबार सर्वोच्च अदालतले टुंग्याएपछि भने कांग्रेस दलको नेता चयनको प्रक्रियामा अघि बढेको छ ।