२५ सहसचिवको सरुवा

काठमाडौं । सरकारले २५ जना सहसचिवहरूको जिम्मेवारी हेरफेर गर्दै सरुवा एवम् काजमा पठाएको छ । बिहीबारको मन्त्रिपरिषद् बैठकले २० जना सहसचिवहरूलाई सातै प्रदेशको मुख्यमन्त्री तथा मन्त्रिपरिषद्को कार्यालय वा अन्तर्गत प्रदेश सचिवको रूपमा कामकाज गर्न खटाइएको हो ।
प्रदेश सचिवका रूपमा खटाइएका कर्मचारीहरूमध्ये मधेश प्रदेशमा सबैभन्दा धेरै पाँच जना सहसचिवहरू पठाइएका छन्, जसमा सेवन्तक पोखरेल, पार्वती शर्मा, महेश बराल, ओम राज ढुंगाना र होमनाथ पौडेल छन् । यसैगरी लुम्बिनी प्रदेशमा पनि पाँच जना सहसचिवहरू जानुका पण्डित, राम पराजुली, नारायणप्रसाद अर्याल, निता पोखरेल अर्याल र सुशीला अर्याललाई खटाइएको छ । 
बागमती प्रदेशका लागि उमेशकुमार ढकाल, महेश भट्टराई, अनिता निरौला र नारायणप्रसाद मैनालीलाई जिम्मेवारी दिइएको छ भने कोशी प्रदेशमा विष्णुप्रसाद कोइराला र रामकृष्ण अधिकारीलाई पठाइएको छ । गण्डकी प्रदेशमा नवराज शर्मा र प्रेरणा सेढाई भट्टराईलाई खटाइएको छ भने कर्णाली प्रदेशमा रोशनीकुमारी श्रेष्ठ र सुदूरपश्चिम प्रदेशमा अर्थमन्त्रालयका मदन दाहाललाई प्रदेश सचिवको जिम्मेवारी तोकिएको छ । प्रदेशबाट संघमा सरुवा हुनेहरूमा कर्णालीका प्रदेश सचिव धोलकराज ढकाललाई संघीय मामिला तथा सामान्य प्रशासन मन्त्रालयमा र गण्डकीका कमलकुमार अधिकारीलाई शहरी विकास मन्त्रालयमा ल्याइएको छ । यस्तै, मधेश प्रदेशका झलकराम अधिकारी र लुम्बिनीका लोकबहादुर सुनारलाई संघीय मामिला तथा सामान्य प्रशासन मन्त्रालयको अतिरिक्त समूहमा सरुवा गरिएको छ । संघीय मामिला मन्त्रालयमा कार्यरत प्रदीप परियारलाई प्रधानमन्त्री तथा मन्त्रिपरिषद्को कार्यालयमा सरुवा गरिएको छ ।