‘युट्युव’ हेरेर सीप, ‘फेसबुक–टिकटक’ बाट बजारीकरण

म्याग्दी । मालिका गाउँपालिका–५ देवीस्थानकी अस्मिता सिउथानी कपडाको डिजाइन र सिलाइकटाइ सम्बन्धी सीप सिकेर आत्मनिर्भर बनेकी छन् ।
उनले बेनीको संगमचोकमा सञ्चालन गरेको अस्मिता टेलरिङ सेन्टरमा आफ्नै डिजाइनमा झोला तयार पार्नुका साथै सिलाइकटाइ सम्बन्धी काम गर्दै आएकी छन् । ग्राहकको मागअनुसार विभिन्न प्रकारका झोला, कुर्ता सुरुवाल, साडी र ब्लाउज तयार पार्न थालेपछि सिउथानीको व्यवसाय फस्टाएको छ । 
फुर्सदको समय सदुपयोग गर्न सिकेको सिलाइकटाइ सम्बन्धी व्यवसायम फस्टाउन सामाजिक सञ्जालले निकै सघाउ पुगेको उनले बताइन् । ‘युट्युव हेरेर झोला र लेडिज कपडाको डिजाइन गर्न सकेको र थालेकी हुँ,’ सिउथानीले भनिन्, ‘ग्राहकको रोजाइअनुसार कपडा र झोला तयार पार्ने र सामाजिक सञ्जाल ‘फेसबुक र टिकटक’ बाटै बजारीकरण गर्दै आएकी छु ।’
काठमाडौँ, पोखराबाट कपडा ल्याएर उनले महिला, विद्यार्थी र पदयात्रीलाई लक्षित गरी झोला तयार पार्छिन् । झोलालाई आकारअनुसार प्रतिगोटा एक हजार २ सयदेखि एक हजार ७ सय रुपैयाँसम्ममा बिक्री गरिरहेको सिउथानीले जानकारी दिइन् ।
‘बेनी बजारसहित म्याग्दीका ग्रामीण क्षेत्रका साथै पोखरा, काठमाडाँै र विदेश जानेहरूले पनि झोला मन पराउने गरेका छन्,’ उनले भनिन्, ‘वि.सं. २०७४ मा सिलाइकटाइ व्यवसाय सुरु गरेकी थिएँ । पछिल्ला केही वर्षयता डिजाइनमा लागिरहेकी छु ।’
यसबाट ‘सिजन’मा मासिक एक लाख ५० हजारदेखि दुई लाखसम्म आम्दानी हुने गरेको छ । ‘मागअनुसार झोला र कपडा बनाउन थालेपछि बजारमा प्रतिस्पर्धा कम भएको छ । अहिले त काम छैन भनेर बस्नुपरेको छैन,’ सिउथानीले भनिन्, ‘दैनिक कारोबार त भइरहेकै छ । सीप सिक्न चाहनेलाई पनि सिकाइरहेकी छु । यसले पैसा र सन्तुष्टि दुवै मिलिरहेको छ ।’
उनलाई एकीकृत सेवा कार्यालय र प्रदेश सरकारले व्यवसाय सञ्चालनका लागि औजार खरिदमा सहयोग गरेको छ । यसले काम गर्न सहज र थप हौसला मिलेको सिउथानीले बताइन् ।