राष्ट्रपतिबाट भानु साहित्य उद्यान शिलान्यास

राष्ट्रिय विभूति आदिकवि भानुभक्त आचार्यको जन्मभूमि तनहुँको चुँदी रम्घालाई नेपाली भाषा र साहित्यको अन्तरराष्ट्रिय केन्द्र बनाउने उद्देश्यका साथ ‘भानु साहित्य उद्यान’ निर्माण सुरु गरिएको छ । 
सो अवसरमा राष्ट्रपति रामचन्द्र पौडेलले भानु चुँदीरम्घालाई भाषा र साहित्यको त्रिवेणीका रुपमा विकास गर्नुपर्नेमा जोड दिएका छन् । भानु साहित्य उद्यानको शिलान्यासपछि आइतबार राष्ट्रपति पौडेलले आदिकवि भानुभक्त आचार्यको योगदानले नेपाली भाषा र पहिचान निर्माणमा महत्वपूर्ण भूमिका खेलेको बताए । “भानुभक्तकै कारण हामी नेपालीको रुपमा परिचित भएका हौं,” राष्ट्रपति पौडेलले भने ।
राष्ट्रपतिले भाषा एकताको आधार भएको उल्लेख गर्दै भानुभक्तको जन्मभूमि चुँदीरम्घालाई नेपाली भाषा र साहित्यको त्रिवेणीका रूपमा विकास गर्नुपर्ने आवश्यकता औंल्याए । साथै, भानु साहित्य उद्यान निर्माणले यस क्षेत्रलाई राष्ट्रिय तथा अन्तराष्ट्रिय स्तरमा समेत चिनाउन महत्त्वपूर्ण सहयोग पुग्ने विश्वास व्यक्त गरे ।
राष्ट्रपति पौडेलले साहित्य उद्यानलाई राष्ट्रिय एकताको केन्द्र बनाउनुपर्ने धारणा राखे । लामो समयदेखि प्रयास सार्थक हुने चरणमा पुगेको बताउँदै उनले यसलाई सहयोग गर्न सबैलाई अपिल गरे । 
तनहुँ–२ का सांसद श्रीराम न्यौपानेले सुशासन र कानुनी आधार बलियो भएको उल्लेख गर्दै विकास तीव्रतर गतिमा अगाडि बढाउन सरकार प्रतिबद्ध रहेको बताए । गण्डकी प्रदेश सरकारका अर्थमन्त्री जितबहादुर शेरचनले भानु साहित्य उद्यान साहित्यिक पर्यटनको केन्द्र बन्नेमा विश्वास व्यक्त गरे ।
स्वीकृत गुरुयोजनाअनुसार साहित्य उद्यानको पूर्ण निर्माणका लागि करिब रु एक अर्ब बजेट खर्च हुने अनुमान गरिएको छ । चालु आर्थिक वर्षमा सङ्घीय सहरी विकास मन्त्रालयबाट रु २० करोड बजेट विनियोजन भइसकेको नगरप्रमुख आनन्दराज त्रिपाठीले जानकारी दिए ।
उक्त बजेटबाट शिखर कटेरीदेखि रम्घा डाँडासम्मको मोटरमार्ग स्तरोन्नति गरी कालोपत्रे सडक निर्माण गरिनेछ भने ५४ फिट उचाइको आदिकवि भानुभक्त आचार्यको विशाल प्रतिमा निर्माण गरिने उनले बताए । हालसम्म गुरुयोजना कार्यान्वयनका लागि करिब ४०० रोपनी जग्गा प्राप्त भइसकेको छ ।
राष्ट्रिय गौरवको आयोजनाका रूपमा उद्यान निर्माण सुरु गरिएको हो । भानु नगरपालिका–४ चुँदीरम्घामा निर्माण हुने उद्यान राष्ट्रपति पौडेलको विशेष परिकल्पना र पहलमा अगाडि बढेको हो । यो योजनाले नेपाली भाषीको भावनात्मक एकता र साहित्यिक पर्यटनलाई जोड्ने विश्वास लिइएको भानु नगरपालिका प्रमुख आनन्दाराज त्रिपाठीले बताए ।
“अघिल्लो पटक केही प्राविधिक अवरोध देखिए पनि यसपटक हामीले सम्पूर्ण तयारी पूरा गरेका छौँ”, उनले भने । 
नगर उपप्रमुख उमा गोतामेले सरकारले विनियोजन गरेको शहरी विकास मन्त्रालयले २० करोड रुपैयाँ बजेटबाट पहिलो चरणको निर्माण हुने बताए । गुरुयोजना अनुसार उद्यानभित्र पहिलो चरणमा आधुनिक ‘भानु भवन’ निर्माण हुनेछ भने क्रमैसँग सातै प्रदेशका प्रमुख साहित्यिक तथा धार्मिक एवं सांस्कृतिक सम्पदाका नमूना र नेपाली साहित्यका मूर्धन्य व्यक्तित्वको सालिक स्थापना गरिने योजना छ ।
नेपाली भाषालाई एकीकरण गर्ने श्रेय पाउनुभएका आचार्यको नेपाली साहित्यमा अतुलनीय योगदान छ । रामायणलाई सरल नेपाली भाषामा लेखेर उनले घर–घरमा वाचन गरिने बनाएका थिए । यस कार्यले छरिएर रहेका नेपालीलाई भाषिक सूत्रमा बाँध्ने काम ग–यो । उहाँको यही साहित्यिक योगदान र राष्ट्रिय एकताको जगलाई जीवन्त राख्न निर्माण गर्न लागिएको यस उद्यानले भावी पुस्ताका लागि अनुसन्धान र प्रेरणाको केन्द्रका रूपमा काम गर्ने अपेक्षा गरिएको छ ।