हल सञ्चालकहरूसँग ठूला वाचा

प्यारामाउन्ट स्काईडान्सका सीईओ तथा अध्यक्ष डेभिड एलिसनले बिहीबार लस भेगासमा आयोजित ‘सिनेमाकन’ उत्सवमा चलचित्र हल सञ्चालकहरूसँग ठूला वाचाहरू गरेका छन् । एलिसनले प्यारामाउन्ट र वार्नर ब्रदर्स मिलेर वर्षमा ३० वटा चलचित्र प्रदर्शन गर्ने ग्यारेन्टी दिँदै ‘आजैदेखि’ लागू हुने गरी ४५ दिनसम्म हलमा मात्रै चलचित्र चलाउने (एक्स्क्लुसिभ थिएटर विन्डो) प्रतिबद्धता जनाएका छन् ।
‘सिनेमा अमर रहोस्,’ एलिसनले भने ।
उनको कम्पनीले १११ अर्ब डलरको सम्झौतामा वार्नर ब्रदर्स डिस्कभरीलाई प्राप्त गर्न लागेको प्रक्रिया हलिउडमा निकै चर्चा र चासोको विषय बनेको छ । तर, एलिसनले आफू चलचित्र र हलहरूप्रति गम्भीर रहेको देखाउन प्रदर्शनीमा उपस्थित सञ्चालकहरूमाझ स्टुडियोको भूत र भविष्य समेटिएको एक शानदार भिडियो प्रस्तुत गरे । जोन एम. चुले निर्देशन गरेको र टम क्रुजले वाचन गरेको उक्त भिडियोमा विल स्मिथ, मार्क वाह्लबर्ग, क्रिस प्राट, टिमथी चालमेट, जोन क्रासिन्स्की र टियाना टेलर जस्ता कलाकारहरूको उपस्थिति थियो । भिडियोको अन्त्यमा टम क्रुज प्यारामाउन्टको प्रसिद्ध ‘वाटर टावर’ मा बसिरहेको देखिन्थे ।
भिडियोमा क्रुजले भने, ‘भविष्य प्यारामाउन्ट हो र यहाँबाट भविष्य निकै राम्रो देखिन्छ ।’
एलिसनले प्रदर्शकहरूलाई भने, ‘म सिनेमा र चलचित्रलाई प्रेम गर्छु । मैले सधैं माया गरें र सधैं गरिरहनेछु । तपाईंहरू मेरो पूर्ण प्रतिबद्धतामा ढुक्क हुन सक्नुहुन्छ ।’
सोही अवसरमा स्टुडियोले ‘टप गन’ को तेस्रो भागको लेखन कार्य भइरहेको र त्यसमा टम क्रुज नै रहने घोषणा समेत गरेको छ ।
प्यारामाउन्टले प्रदर्शकहरूका लागि जोनी डेप, बिली आइलिस र जेम्स क्यामरुन जस्ता हस्तीहरूलाई मञ्चमा उतारेको थियो । उनीहरूले ‘कल अफ ड्युटी’, ‘अ क्वाइट प्लेस पार्ट थ्री’ र ‘सोनिक द हेजहग ४’ जस्ता चर्चित ब्रान्डका चलचित्रहरूका साथै डेजी एड्गर–जोन्सको ‘टुमरो, एन्ड टुमरो एन्ड टुमरो’, सिलियन मर्फी र डेनियल क्रेगको नयाँ चलचित्र र टियाना टेलरको निर्देशनमा बन्ने नृत्य चलचित्र ‘गेट लाइट’ को चर्चा गरे ।
जोनी डेपले आफ्नो बाल्यकालदेखिको रुचिको कथा ‘एभेन्जरः अ क्रिसमस क्यारोल’ मा अभिनय गर्नेबारे बताए । त्यस्तै, ‘स्क्यारी मुभी ६’ का लागि मार्लन वेयन्स, शन वेयन्स र अन्ना फारिस मञ्चमा देखिएका थिए ।
फेब्रुअरीको अन्त्यमा प्यारामाउन्ट स्काईडान्सले वार्नर ब्रदर्स डिस्कभरीलाई किन्ने सम्झौता गरेको थियो, जसले गर्दा चलचित्र व्यवसायमा कस्तो असर पर्ला भन्ने बहस सुरु भएको छ । मंगलबार वार्नर ब्रदर्सको प्रस्तुतिमा कसैले प्यारामाउन्टको नाम लिएनन्, तर डेनिस भिलेन्युभ र जे.जे. अब्राम्स जस्ता धेरै फिल्मकर्मीहरूले यो मर्जरको विरोधमा हस्ताक्षर गरेका छन् ।
जेम्स क्यामरुनले भने यो सम्झौताको समर्थन गरेका छन् । उनले एलिसनलाई ‘जन्मजात कथावाचक’ र ‘चलचित्रलाई वास्तविकतामै माया गर्ने व्यक्ति’को रूपमा प्रशंसा गर्दै उनी स्टुडियो चलाउनका लागि सही व्यक्ति भएको बताए ।
केही महिनाअघि मात्रै स्काईडान्ससँग ८ अर्ब डलरको मर्जर सकेको प्यारामाउन्टले सन् २०२६ मा १५ वटा चलचित्र हलमा रिलिज गर्ने वाचा गरेको छ । यो सम्झौतालाई अहिले सेयरधनीहरूको मतदान र सरकारी नियामक निकायको स्वीकृतिको प्रतीक्षा छ । अमेरिकी न्याय विभागले यो ठूलो मर्जरले बजारमा एकाधिकार जमाउन सक्ने र ग्राहकलाई असर पर्न सक्ने विषयमा छानबिन गर्न बाँकी छ ।
प्यारामाउन्टले भने वार्नरसँगको मर्जरले स्ट्रिमिङको क्षेत्रमा ठूला प्रतिस्पर्धीहरूसँग लड्न मद्दत गर्ने र ग्राहकहरूलाई ‘ह्यारी पोर्टर’, ‘सुपरम्यान’ र ‘बार्बी’जस्ता विशाल सामग्रीको भण्डार उपलब्ध गराउने तर्क गरेको छ । यस प्रक्रियामा करिब ६ अर्ब डलर वचत गर्न केही कर्मचारी कटौती हुन सक्ने संकेत पनि गरिएको छ ।
बुधबार वासिङ्टनमा सिनेटर कोरी बुकरले हलिउडका पाँच ठूला स्टुडियोमध्ये दुईवटा गाभिँदा हुने प्रतिस्पर्धात्मक असरबारे सुनुवाइ गरेका थिए । अभिनेता मार्क रफालोले यसको विरोध गर्दै हजारौं कामदारहरूको काम खोसिने र दर्शकलाई पनि घाटा हुने बताए । यद्यपि, डेभिड एलिसन उक्त सुनुवाइमा उपस्थित भएनन् ।