दिल्लीमा एभरेष्ट चेम्बरको नयाँ नेतृत्व चयन, डा. मोहन कार्की सर्वसम्मत अध्यक्ष

 
नयाँदिल्ली । भारतमा रहेका प्रवासी नेपाली उद्योगी–व्यवसायीहरूको छाता संगठन एभरेष्ट चेम्बर अफ कमर्श एण्ड इण्डस्ट्रिज (इसीसीआई) ले डा. मोहन कार्कीको नेतृत्वमा २७ सदस्यीय केन्द्रीय कार्यकारिणी समिति चयन गरेको छ । नयाँ दिल्लीमा सम्पन्न पाँचौं वार्षिक साधारण सभाले सर्वसम्मत रूपमा कार्र्की नेतृत्वको नयाँ कार्यकारिणी समिति चयन गरेको हो। योग विषयमा विद्यावारिधि हासिल गरेका कार्की द योगगुरु इन्स्टिच्युटका संस्थापक हुन् । उनको आइटी क्षेत्रमा समेत लगानी रहेको छ । अन्तराष्ट्रिय आइटी कम्पनी जेनिस भारतका निर्देशक हुन् । 

संस्थाले सदस्य विस्तार भएका राज्यहरूलाई ६ क्षेत्र (जोन) मा विभाजन गरी उपाध्यक्षहरू चयन गरेको छ। जसअनुसार महाराष्ट्रबाट मनोज कोटाल, नेपालबाट दुर्गा सुवेदी, मध्यप्रदेशबाट गणेश पाण्डे, पश्चिम बंगालबाट खेमराज बराल, राजकुमार श्रेष्ठ, राम नेपाल र प्रमोद खरेल चयन भएका छन् ।
 
त्यसैगरी महासचिवमा चन्द्र लामिछाने, उपमहासचिवमा एल.पी. पाण्डे, कोषाध्यक्षमा सीए सन्दीप कौशल चयन भएका छन् । अन्य सदस्यसहित २७ सदस्यीय कार्यकारिणी समिति गठन गरिएको छ।
 
कार्यक्रममा नवनिर्वाचित अध्यक्ष कार्कीलाई निवर्तमान अध्यक्ष युवराज बरालले पदभार हस्तान्तरण गरेका थिए। नवगठित कार्यसमितिले सोही दिन पहिलो बैठक सम्पन्न गर्दै तीन महत्वपूर्ण प्रस्ताव पारित गरेको छ।
 
नव अध्यक्ष कार्कीले संस्थालाई सशक्त नेटवर्किङ प्लेटफर्मका रूपमा अघि बढाउने प्रतिबद्धता व्यक्त गर्दै पारदर्शिता र संस्थागत विकासलाई प्राथमिकता दिने बताए ।
 
कार्यक्रमलाइ सम्बोधन गर्दै नेपाली दूतावासका नियोग उपप्रमुख सुरेन्द्र थापाले भारतमा प्रवासी नेपाली व्यवसायीहरूको संगठनप्रति गर्व व्यक्त गर्दै दूतावासले विगतको जसरी नै नयाँ कार्यसमितिसँग सहकार्य गर्ने आश्वासन दिए ।उनले जलविद्युत, होटल, आतिथ्य, आयुर्वेद तथा वेलनेस क्षेत्रमा लगानी प्रवद्र्धनका लागि आयूर्वेद र योगका विज्ञ कार्की नेतृत्व सक्रिय हुनसक्ने उल्लेख गरे ।

नेपाललाई व्यापार, पर्यटन र लगानीको आकर्षक गन्तव्यका रूपमा भारतमा प्रवद्र्धन गर्न संस्थाले महत्वपूर्ण भूमिका खेल्न सक्ने उल्लेख गर्दै थापाले भने“इसीसीआईले भारतीय तथा प्रवासी नेपालीहरुको लगानी समेत नेपाल लैजान भुमिका खेल्नुपर्छ ।”
 
सन् २००८ मा स्थापना भएको इसीसीआईका संस्थापक अध्यक्ष चिरञ्जीवी मरासिनी थिए भने दोस्रो अध्यक्षका रूपमा युवराज बरालले नेतृत्व गरेका थिए। स्थापना भएको करिब १८ वर्षपछि तेस्रो अध्यक्षका रूपमा डा. कार्की चयन भएका हुन्।
 
हाल इसीसीआईमा भारतका विभिन्न ६ राज्यमा रहेका ५सय भन्दा बढी नेपाली मूलका उद्योगी–व्यवसायी आबद्ध छन् । नयाँ कार्यकारिणी समितिको कार्यकाल तीन वर्षको हुनेछ।