अस्पतालहरुको अनुगमन गरिँदै

काठमाडौं । सरकारले अस्पतालहरुको अनुगमन सुरु गरेको छ । स्वास्थ्य तथा जनसंख्या मन्त्रालयको गुणस्तर मापन तथा नियमन महाशाखाले डा.  रोशन न्यौपानेको नेतृत्वमा विशेष टोली परिचालन गरेको हो । टोलीले सरकारी तथा निजी अस्पतालहरूको दैनिक अनुगमनलाई उच्च प्राथमिकताका साथ तीव्रता दिएको मन्त्रालयका सहप्रवक्ता डा. समीर अधिकारीले जानकारी दिए । 
हाल सघन सुपरीवेक्षण र सुधारका लागि सचेत गराउने कार्य भइरहे पनि अनुगमनका क्रममा तोकिएको मापदण्ड र गुणस्तरमा कुनै पनि कमजोरी वा लापरबाही भेटिएमा जिम्मेवार अधिकारीलाई कानुनी दायरामा ल्याई आवश्यक कारबाही अगाडि बढाउने गरी मन्त्रालयले नियमनमा पछिल्लो समय निकै कडाइ गरेको छ । 
अस्पतालको अनुगमनलगत्तै अब फार्मेसीलगायत स्वास्थ्य सेवा प्रवाह हुने अन्य सबै केन्द्रमासमेत अनुगमनलाई तीव्र पार्ने मन्त्रालयको तयारी छ । अभियानअन्तर्गत गत साता कान्ति बाल अस्पताल र अल्का अस्पतालमा छड्के अनुगमन गरिएको थियो ।