‘आदिम फूल’ सार्वजनिक

साहित्यकार विष्णुभक्त राई ‘विभरा किराती’को कविता सङ्ग्रह ‘आदिम फूल’ बजारमा आएको छ । खोटाङको दिक्तेल रुपाकोट मझुवागढी नगरपालिका–१४ कुइपामा जन्मिएर ललितपुर जिल्लाको महालक्ष्मी नगरपालिका–७ चाँगाथलीमा बसेर साहित्य सिर्जना गर्दै आएका साहित्यकार विभरा किरातीले चौथो कृतिका रुपमा ‘आदिम फूल’ कविता सङ्ग्रह प्रकाशन गरेका हुन् ।
नेपालका आदिवासी जनजाति समुदायको अवस्था तथा किराती सभ्यता र संस्कृतिलाई प्रमुख प्राथमिकतामा राखेर प्रकाशन गर्नुभएको कविता सङ्ग्रह ‘आदिम फूल’मा ३८ वटा फुटकर कविता समेटिएका छन् । नेपाली समाजमा भएका वर्गीय, जातीय, सांस्कृतिक एवं राजनीतिक परिवेशलाई समेटेर प्रकाशन गरिएको ‘आदिम फूल’ कविता सङ्ग्रह शनिबार ललितपुरमा आयोजित कार्यक्रममा प्राध्यापक डा लक्ष्मणप्रसाद गौतमले औपचारिक रुपमा विमोचन गरेका छन् ।
त्यस अवसरमा प्राध्यापक डा गौतमले साहित्यकार विभरा किरातीको कतिवा सङ्ग्रहमा शक्तिशाली कविता रहेको बताएका छन् । “कविता चित्रात्मक र सङ्केतात्मक हुन्छन् । विभरा किरातीको कतिवामा त्यो दुवै भेटिएको छ,” उनले भने, “साहित्यकार विभरा किरातीलाई यो आदिम फूल कविता सङ्ग्रहले एउटा उचाइमा पु–याएको छ । आगामी दिनमा लेखन कलालाई निरन्तरता दिँदै अझ सशक्त साहित्य सिर्जन गर्न आग्रह गर्दछु ।”
खोटाङको बुइँपामा जन्मिएर अष्ट्रेलियामा बसोबास गर्दै आएकी अप्सरा दालोमा विष्ट प्रकाशक रहेकी कविता सङ्ग्रह आदिम फूलको भूमिका समालोचक डा हेम भण्डारीले लेखेकी छन् । विभरा किरातीको कविता सङ्ग्रह आदिम फूलमा आदिवासी पहिचान, सामाजिक पर्यावरण, शासकवर्गीय प्रभुत्व, राजनीतिक कुसङ्केतन, स्वाधिनता चेत, सांस्कृतिक प्रतिरोधजस्ता सामाजिक विषयहरु समेटिएको भेटिएको समालोचक डा भण्डारीले औँल्याएका छन् । 
शनिबार यहाँ आयोजित कविता सङ्ग्रह विमोचन कार्यक्रममा समालोचक डा सुरेश हाँचेकालीले प्रकाशित कविता सङ्ग्रहमाथि समालोचना गरेका थिए । समालोचक डा हाँचेकालीले साहित्यकार विभरा किरातीको कविता सङ्ग्रह आदिम फूलले सांस्कृतिक पहिचान स्थापित गर्न ठूलो भूमिका निर्वाह गर्ने बताए ।