सारिकालाई छिन्नलता गीत पुरस्कार

गायिका सारिका घिमिरेलाई यस वर्षको छिन्नलता गीत पुरस्कार गुठीले लोकप्रिय युवा प्रतिभा पुरस्कार प्रदान गर्ने भएको छ । ‘गुन भुल्यौ, पित्तलको सुन पायौ होला...’ बोलको गीत रचना, संगीत र गायनका लागि घिमिरेलाई उक्त पुरस्कार प्रदान गरिने भएको हो ।
गुठीले वरिष्ठ गायक मदनकृष्ण श्रेष्ठलाई विशेष सम्मान गर्ने भएको छ । गुठीका अध्यक्ष प्रा डा वासुदेव त्रिपाठीको सभापतित्वमा सम्पन्न गुठीको साधारणसभाले उक्त निर्णय गरेको हो । 
बैठकले गीत, संगीत र गायनतर्फको यस वर्षको पुरस्कार पनि घोषणा गरेको छ । गुठीका सचिव दिनेश अधिकारीका अनुसार गीत रचनातर्फ डा. नवराज लम्साल र संगीत रचनातर्फ किरण कँडेल र गायनतर्फ विमला राईलाई पुरस्कार प्रदान गर्ने निर्णय गरेको छ । 
पुरस्कार र सम्मान गुठीका संस्थापिका तथा गीतकार स्व. रमोलादेवी शाह ‘छिन्नलता’को जन्ममिति आगामी साउन ९ गते हरिशयनी एकादशीका दिन प्रदान गरिने गुठीले जनाएको छ ।