प्रेस स्वतन्त्रता संरक्षणको माग गर्दै सभामुखलाई ध्यानाकर्षण पत्र

काठमाडौँ । नेपाल पत्रकार महासङ्घले प्रतिनिधिसभाका सभामुख डोलप्रसाद अर्याल समक्ष प्रेस तथा अभिव्यक्ति स्वतन्त्रताको संरक्षण गर्न माग गर्दै ध्यानाकर्षण पत्र बुझाएको छ।
महासङ्घको प्रतिनिधिमण्डलले सोमबार सिंहदरबारस्थित सभामुखको कार्यकक्षमा भेट गरी संविधान संशोधन, कानुन निर्माण तथा कार्यान्वयनका क्रममा प्रेस स्वतन्त्रतामा कुनै प्रकारको हस्तक्षेप वा सङ्कुचन नगर्न आग्रह गरेको महासङ्घकी अध्यक्ष निर्मला शर्माले जानकारी दिइन।
भेटका क्रममा सभामुख अर्यालले प्रेस स्वतन्त्रताप्रति आफू प्रतिबद्ध रहेको बताएका थिए । यस्तै महासङ्घले राष्ट्रियसभाका अध्यक्ष नारायणप्रसाद दाहाल तथा संसदको विषयगत समिति शिक्षा, स्वास्थ्य तथा सूचना प्रविधि समितिका सभापति डा।ओजस्वी शेरचनलाई भेटेर ध्यानाकर्षण पत्र बुझाएको छ।
महासङ्घले सरकारले संविधान संशोधन बहसपत्र तयार गर्न कार्यदल गठन गरेको सन्दर्भमा संसद्भित्र रहेका सबै राजनीतिक दलको व्यापक सहमतिमा उच्चस्तरीय सुझाव कार्यदल गठन गर्नुपर्ने सुझाव दिएको छ।
महासङ्घले नेपालको संविधानले सुनिश्चित गरेको सङ्घीय लोकतान्त्रिक गणतन्त्र, धर्मनिरपेक्षता, समावेशिता, सार्वभौमसत्ता तथा पूर्ण प्रेस स्वतन्त्रतालाई अझ सुदृढ बनाउनुपर्ने धारणा पनि व्यक्त गरेको छ।
सरकारी विज्ञापन नीतिविरुद्ध आन्दोलन
सरकारी सूचना तथा विज्ञापन सरकारी सञ्चारमाध्यमलाई मात्र दिने निर्णयविरुद्ध आन्दोलनरत महासङ्घले उक्त निर्णय विभेदकारी भएको भन्दै फिर्ता लिन माग गरेको छ।
महासङ्घले सरकारी सूचना वितरणमा विभेद हटाउन, सञ्चारमैत्री कानुन निर्माण गर्न तथा श्रमजीवी पत्रकारको अधिकार सुनिश्चित गर्न सरकारसँग माग गरेको छ।
राष्ट्रियसभा अध्यक्ष दाहालले सरकारद्वारा सरकारी र निजी सञ्चारमाध्यमबीच विभेद गर्नु उचित नभएको टिप्पणी गर्दै सञ्चार क्षेत्र सङ्कुचित हुने अवस्था सिर्जना हुनु चिन्ताको विषय भएको बताएका थिए । महासङ्घले साताव्यापी दबाब आन्दोलनबाट पनि माग सम्बोधन नभए थप सशक्त आन्दोलनका कार्यक्रम ल्याइने चेतावनी दिएको छ ।