प्रविधि र लगानी सहकार्यमा जोड दिँदै सकियो नेपाल टेक रोडशो

अस्ट्रेलिया (संवाददाता)– नेपाल एशोसिएसन फर सफ्टवेयर एण्ड आईटी सर्भिस कम्पनीज (एनएएस–आईटी) ले आयोजना गरेको नेपाल टेक रोडशो अस्ट्रेलिया २०२५ सिड्नीस्थित राइड्जेस वर्ल्ड स्क्वायरमा सम्पन्न भएको छ ।

यस कार्यक्रममा नेपाल र अस्ट्रेलियाका प्रविधि उद्यमी, आविष्कारक, उद्योगी र लगानीकर्ताहरू भेला भएका थिए । कार्यक्रम दुवै देशबीच सहकार्य र लगानीको सम्भावना खोज्ने उद्देश्यले आयोजना गरिएको थियो ।

कार्यक्रममा ‘अस्ट्रेलियाली र नेपाली प्रविधि इकोसिस्टमबीच सहकार्य र लगानीका अवसर’ विषयमा छलफल भएको थियो । एमिनेंस वेजका प्रबन्ध निर्देशक नारायण कोइरालाले सञ्चालन गरेको प्यानल छलफलमा रारा ल्याब्सका सीईओ मनोज घिमिरे, इबी पिअर्सका क्रिएटिभ डाइरेक्टर माइकल सिग्नल र एमटीएक्स एपाकका सीईओ सुदीप आचार्य सहभागी थिए । 

उनीहरूले दुवै देशबीच सहकार्यका चुनौती र अवसरबारे बहस गर्दै व्यावहारिक कदमहरू प्रस्तुत गरेको आयोजकले जनाएको छ । रोडशोले नेपाली स्टार्टअपहरूले विकास गरेका नवीन समाधान, अन्तर्राष्ट्रिय बजारमा देखिएको सम्भावना, र अस्ट्रेलियाली लगानीकर्ताहरूका लागि आकर्षक अवसरहरूलाई उजागर गरेको बताइएको छ ।

कार्यक्रम एनसेल बिजनेसको सहयोगमा सम्पन्न भएको थियो । एनएएस–आईटीले भविष्यमा पनि यस्ता अन्तर्राष्ट्रिय कार्यक्रमलाई निरन्तरता दिँदै नेपाललाई विश्वसनीय प्रविधि गन्तव्यका रूपमा स्थापित गर्ने लक्ष्य लिएको जनाएको छ । 

यो संस्था नेपालकै अग्रणी गैर– नाफामुखी संस्था हो, जसले आईटी उद्योगलाई प्रतिनिधित्व गर्दै नवप्रवर्तन प्रवर्द्धन, उद्यमशीलता समर्थन र नीतिगत सुधारमार्फत विश्वबजारमा नेपालको उपस्थिति बलियो बनाउन काम गरिरहेको छ ।