‘लुसिफर राइजिङ’ नाटक पुनः मञ्चन हुने, निर्देशक सहलेश हटाइए

काठमाडौँ । बानेश्वरस्थित थापा गाउँको लेखन कुञ्जमा मञ्चन भइरहेको नाटक ‘लुसिफर राइजीङ्गः ए जेन–जी प्ले’ पुनः प्रदर्शन हुने भएको छ । नाटक घर उपलब्ध गराउँदै आएको संस्था ’एक थिएटर नेपाल’ले विज्ञप्ति जारी गर्दै नाटक पुनः मञ्चन गर्ने सहमति भएको जानकारी दिएको हो ।
यसअघि नाटकका लेखक तथा निर्देशक सहलेशले ‘नाटक मञ्चन रोक्न दबाब र धम्की आएको’ भन्दै एकतर्फी रूपमा सूचना टाँसेर अनिश्चितकालका लागि प्रदर्शन रोकेका थिए । तर, एक थिएटर नेपालका अनुसार लेखक तथा निर्देशकसँग छलफल गर्दा उनले दबाब वा धम्की आएको कुनै पनि प्रमाण पेश गर्न सकेनन् । कुनै दबाब वा धम्कीका कारण नभई आन्तरिक वा अन्य कुनै उद्देश्यले नाटक रोकिएको निष्कर्ष निकाल्दै संस्थाले यस घटनाबाट समग्र नाट्य क्षेत्रकै बद्नाम भएको र आफूहरूलाई लज्जाबोध भएको जनाएको छ ।
यसैबीच, नाटकको निर्माता संस्था ‘मझुवा बगर जनकला मञ्च’ ले लेखक तथा निर्देशक सहलेशलाई नाटकबाट बर्खास्त गरेको छ । सहलेशले ‘सरकारविरुद्ध अफवाह फैलाएको’ र ‘सम्पूर्ण नाट्य समुदायको अपमान गरेको’ आरोप लगाउँदै निर्माता संस्थाका अध्यक्ष वसन्तनाथ लामिछाने ‘चट्टान’ को हस्ताक्षरसहितको पत्र एक थिएटर नेपालसमक्ष पेश गरिएको छ ।
अहिले नाटकको निर्माण पक्ष, कलाकार र अन्य जिम्मेवार पक्षहरूबीच लामो र गहन छलफल भएको छ । छलफलपछि नाटकलाई निर्माण संस्थाले पारित गरेको मूल स्क्रिप्टभित्रै रहेर (इम्प्रोभाइज नगरी) पुनः प्रदर्शन गर्ने सहमति बनेको छ ।
एक थिएटर नेपाल र मझुवा बगर जनकला मञ्चबीच नाटक पुनः प्रदर्शन गर्ने सम्बन्धमा नयाँ सम्झौता समेत भइसकेको छ । सम्झौताअनुसार नाटक मञ्चनका क्रममा आइपर्ने नाटक घरसँग सम्बन्धित व्यवधानबाहेक अन्य कुनै पनि कुरामा एक थिएटर नेपाल जिम्मेवार रहने छैन ।
एक थिएटर नेपालका अध्यक्ष अनिल सुब्बाद्वारा जारी प्रेस नोटमा यस विवादका क्रममा अभिव्यक्ति स्वतन्त्रताको पक्षमा वकालत गर्ने अग्रज व्यक्तित्वहरू, सहजीकरण गरिदिने प्रतिनिधि सभा सदस्यहरू, प्रहरी प्रशासन तथा सञ्चारकर्मीहरूलाई धन्यवाद ज्ञापन गरिएको छ ।