लामिछानेलाई भाजपाको न्यानो स्वागत

काठमाडौं । भारतीय सत्तारुढ दल जनता पार्टीको निमन्त्रणमा मैत्रीपूर्ण भ्रमणका क्रममा दिल्लीमा रहेका राष्ट्रिय स्वतन्त्र पार्टीका सभापति रवि लामिछाने भेटघाटमा व्यस्त छन् । मंगलबार उनलाई भाजपाले आफ्नो पार्टी केन्द्रीय कार्यालयमा भव्य स्वागत गरेको छ । भाजपाका अध्यक्ष नितिन नवीनले पार्टी मुख्यालयमा स्वागत गरे । 
लामिछानेले भारतीय सत्तारुढ दल भाजपाका शीर्ष नेतृत्वसँग भेटवार्ता गरेका छन् । भेटवार्तापछि भाजपा विदेश विभाग प्रमुख विजय चौथाइवालेले विज्ञप्ति जारी गर्दै दुई देशबिचको सम्बन्धलाई थप प्रगाढ बनाउन यो वार्ता महŒवपूर्ण भएको उल्लेख गरेका छन् । दुवै दलका संवादलाई कूटनीतिक रूपमा अघि बढाउन यस वार्ताको महŒव रहेको पनि जनाएका छन् । दुवै नेताले भेटमा राजनीतिमा जेनजीको बढ्दो भूमिकाका बारेमा कुराकानी गरेका थिए । लोकतान्त्रिक सहभागिता र भविष्यको नेतृत्वमा जेनजीको भूमिकाबारे पनि उनीहरूबीच कुराकानी भएको बताइएको छ । 
त्यस्तै, लामिछानेले मंगलबार नै भारतीय गृहमन्त्री एवम् भाजपाका नेता अमित शाहसँग भेटवार्ता गरेका छन् । गृहमन्त्री शाहले गत फागुन २१ को आम निर्वाचनमा रास्वपाको जितका लागि लामिछानेलाई बधाई दिए । उनले नयाँ सरकारको सफलताका लागि भारत सरकारको तर्फबाट शुभकामना व्यक्त गरेको शाहको सचिवालयले जनाएको छ । 
भेटमा दुवै पक्षले भारत–नेपालबीचको विशेष सम्बन्धलाई अझ सुदृढ बनाउन मिलेर काम गर्ने दृढ प्रतिबद्धता व्यक्त गरेको शाहको सचिवालयले  जानकारी दिएको छ ।
त्यस्तै, लामिछानेले भारतीय विदेशमन्त्री एस जयशंकरसँग पनि भेटवार्ता गरेका छन् । भेटमा विकास साझेदारी र नागरिक–नागरिक सम्बन्धमा छलफल भएको विदेशमन्त्री जयंशकरले सामाजिक सञ्जाल एक्समार्फत जानकारी दिएका छन् ।  जयशंकरले विकास साझेदारी बारेमा पनि छलफल भएको बताएका छन् । ‘आज दिल्लीमा नेपालको राष्ट्रिय स्वतन्त्र पार्टीका सभापति रवि लामिछाने र उनको प्रतिनिधिमण्डलसँग भेट्न पाउँदा खुसी लाग्यो ।  हाम्रा छलफल विकास साझेदारी र जनता–जनताबीचको सम्बन्धमा केन्द्रित थिए । यी सम्बन्धहरूले विकास, प्रगति र समृद्धिलाई प्रवद्र्धन गर्न महत्वपूर्ण भूमिका खेल्छन्,’ उनले एक्समा लेखेका छन् । 
सभापति लामिछाने पाँच दिने भ्रमणका क्रममा पार्टीका केही नेतासहित सोमबार अपराह्न नयाँदिल्ली पुगेका हुन् । भ्रमण टोलीमा लामिछाने पत्नी निकिता पौडेल, रास्वपा सहमहामन्त्री विपिन आचार्य, विदेश विभाग प्रमुख दीपक बोहरासँगै छन् । 
फागुन २१ को निर्वाचन पछि सुविधाजनक मत पाएर नेपालमा रास्वपाको एकल शक्तिशाली सरकार छ । सत्ता सञ्चालनका लागि रास्वपाले अन्य दलसँग गठबन्धनको आवश्यकता छैन । त्यसैले राास्वपासँगै सभापति लामिछाने सत्ता राजनीतिमा प्रभावशाली छन् । त्यसैले पनि उनको भारत भ्रमणलाई राजनीतिक वृत्तमा अर्थपूर्ण रुपमा हेरिएको छ ।