‘डङ्की’ आउँदै

डा. चन्द्र गिरीको उपन्यास ‘डङ्कीः सपनाको कालबाटो’ यही जेठ अन्तिम साता बजारमा आउने भएको छ । 
एउटा युवाको विदेश सपना, विस्थापन, संघर्ष र मानवीय संवेदनालाई केन्द्रमा राखेर लेखिएको उपन्यास बुकहिल प्रकाशनले प्रकाशित गरेको हो । 
लेखक गिरी तथा प्रकाशकका अनुसार उपन्यासको लोकार्पण जेठ अन्तिम साता काठमाडौंमा गर्ने तयारी छ । 
यसैबीच, ‘डङ्की ः सपनाको कालबाटो’ को आवरण (कभर) अमेरिकामा सार्वजनिक गरिएको छ । अन्तर्राष्ट्रिय नेपाली साहित्य समाज (अनेसास) को आयोजनामा अमेरिकाको कोलोराडोमा आयोजित नवौं नेपाली साहित्य सम्मेलनका क्रममा कभर सार्वजनिक गरिएको हो ।
सम्मेलनमा लेखक डा. नवराज लम्साल, अन्तराष्ट्रिय नेपाल साहित्य समाज (अनेसास) का अध्यक्ष सर्वज्ञ वाग्ले, अनेसास ट्रस्टीका सभापति पदम विश्वकर्मा, मदन पुरस्कार विजेता डा निलम कार्की निहारिका, डा. ऋषि वस्ताकोटी, डा. शरद परासर, सुरेश कुमार भट्ट, गोविन्द अधिकारी लगायतको सहभागिता थियो । 
आवरण अनावरण कार्यक्रममा आफ्नो कृतिको भावभूमिबारे प्रकाश पार्दै लेखक डा. चन्द्र गिरीले उपन्यास केवल एउटा कथा मात्र नभएर सुन्दर सपनाको खोजीमा हिँडिरहेका असंख्य प्रवासीहरूको एउटा सजीव र करुण मानवीय दस्तावेज भएको बताए । 
सार्वजनिक गरिएको आवरणमा एक यात्री मरुभूमि र सिमाना पार गर्दै अनिश्चित गन्तव्यतर्फ अघि बढिरहेको दृश्य देखिन्छ, जसले ‘डङ्की रुट’ मार्फत हुने जोखिमपूर्ण आप्रवासन यात्राको प्रतीकात्मक चित्रण गर्दछ । 
विक्रम सम्वत् २०१८ सालमा खोटाङमा जन्मिएका डा. गिरी अमेरिकी सरकारको वातावरण मन्त्रालयमा वरिष्ठ सल्लाहकार र ड्युक विश्वविद्यालयमा एडजन्क्ट प्रोफेसर छन् । मेन्ग्रोभ वनको नक्सांकन र अनुगमनका अगुवा डा. गिरीका ‘मैले नदेखेको सपना’ संस्मरण र ‘संसारको सेरोफेरो’ नियात्रा चर्चित छन् ।