विकास कूटनीतिमा नयाँ विश्वास

काठमाडौं । भारतीय प्रधानमन्त्री नरेन्द्र मोदीले नेपाल–भारतबीचका विभिन्न विषयको सूची तयार पारेर काम गर्न आफू तयार रहेको बताएका छन् । भारत भ्रमणमा रहेका सत्तारुढ दल रास्वपाका सभापति रवि लामिछानेसँग बुधबार भएको  भेटमा मोदीले दुई देशबीचका विषयलाई प्राथमिकता दिएर काम गर्न प्रतिबद्ध रहेको बताएका थिए ।  
लामिछानेले मोदीसँगको भेटमा विकास कूटनीतिको नयाँ युगतर्फ अग्रसर हुने धारणामा सहमत रहेको बताएका छन् । भारतीय जनता पार्टीको निमन्त्रणमा ५ दिने भारत भ्रमणमा रहेका लामिछानेले बुधबार नयाँ दिल्लीमा प्रधानमन्त्री मोदीसँग भेट गरेका हुन् । भेटपछि विकास कूटनीतिको नयाँ युगतर्फ अग्रसर हुने मोदीको धारणामा आफू सहमत भएको लामिछानेले बताएका छन् ।
मोदीले भेटपछि तस्विर आफ्नो सामाजिक सञ्जाल एक्समा सार्वैजनिक गर्दै लेखेका छन्, ‘हाम्रो छिमेकी पहिलो नीतिअन्तर्गत नेपाल एक प्राथमिकता साझेदार हो र हामी हाम्रा दुई देशहरूबीचको विशेष र बहुआयामिक सम्बन्धलाई अझ उचाइमा पु¥याउन नयाँ सरकारसँग सहकार्य गर्न तत्पर छौं ।’ मोदीको उक्त भनाइ सेयर गर्दै लामिछानेले लेखेका छन्, ‘आज माननीय प्रधानमन्त्री नरेन्द्र मोदीसँग एक घण्टा लामो, अत्यन्त फलदायी र अर्थपूर्ण संवाद गर्न पाउँदा मलाई अत्यन्त खुसी लागेको छ । नेपाल र भारतले विगतका सीमिततालाई पार गर्दै विकास कूटनीतिको नयाँ युगतर्फ अग्रसर हुने भविष्यबारे मेरो पनि तपाईंको जस्तै दृष्टिकोण छ ।’
त्यस्तै, दुई देशका साझा सभ्यता, डिजिटल कनेक्टिभिटी र निर्बाध सम्पर्क विस्तारलाई प्राथमिकतामा राखेर प्रगति र पारस्परिक विश्वासमा साझेदारीलाई थप सुदृढ बनाउन सकिने लामिछानेको भनाइ छ ।