धवलशमशेरको नेतृत्वमा फेरि फुट्यो राप्रपा

काठमाडौं । हिन्दु राष्ट्र र राजसंस्था पुनस्थापनाको माग राख्दै आएको राष्ट्रिय प्रजातन्त्र पार्टी फेरि विभाजन भएको छ । महामन्त्री धवलशमशेर राणाको नेतृत्वमा राप्रपा ११औं पटक फुटेको हो । उनले सनातन हिन्दु राष्ट्र र राजसंस्थालाई केन्द्रमा राख्ने नयाँ पार्टी स्थापना गर्ने घोषणा पनि गरेका छन् । 
राणासहित १८६ जनाले बिहीबार काठमाडौंमा पत्रकार सम्मेलन गर्दै सामूहिक रूपमा राप्रपा छाडेको घोषणा गरे । केही समयदेखि अध्यक्ष राजेन्द्र लिङ्देनसँग मतभेद भएपछि राणा पार्टी मूलधारमा सक्रिय थिएनन् । ०८१ चैत १५ गते दुर्गा प्रसाई नेतृत्वमा भएको राजसंस्था पक्षधरको आन्दोलन हिंसात्मक बनेपछि राणा, तत्कालीन राप्रपा उपाध्यक्ष रवीन्द्र मिश्र र प्रसाई पक्राउ परेका थिए । सो क्रममा आफूहरुलाई छुटाउन पहल नगरेको भन्दै राणा असन्तुष्ट थिए । मिश्रले यसअघि नै पार्टी परित्याग गरिसकेका छन् । नयाँ पार्टीमा दुर्गा प्रसाईसहितलाई जोडेर अघि बढ्ने राणाको तयारी छ । 
राणाले पार्टी परित्याग गर्दै गर्दा राजेन्द्र लिङ्देन नेतृत्वको राप्रपाबाट पार्टीको उद्देश्य पूरा नहुने भन्दै बाहिरिएको बताएका छन् । ‘दुःखका साथ आज हामीले घर नै छोड्नुपर्ने अवस्था आयो । त्यो सुखको दिन होइन, दुःखको दिन हो आज,’ राणाले भनेका छन्, ‘तर आफ्नो राजनीतिक यात्रामा जब केही हासिल गर्न आफूले बोकेको मूल्य र मान्यतालाई आफू बसेको घरबाट पार लाग्दैन भन्ने ठानिसकेपछि हिम्मत गर्नुपर्छ र अर्को घर बनाउनुपर्छ ।’ उनले हिन्दु राष्ट्र र राजसंस्था पुनःस्थापना वर्तमान राप्रपाबाट सम्भव नहुने दाबी गरेका छन् । ‘जनताले राजा र धर्म बोकेको मजबुत पार्टी खोजिरहेका छन्् । त्यो परिपूर्ति गर्न हामी अगाडि बढेका हौं,’ राणाले पत्रकार सम्मेलनमा भने । 
उनले राप्रपा मक्किसकेको र चर्किसकेको भन्दै हिम्मत गरेर अर्को पार्टी बनाउने आवश्यकता परेको भन्दे पार्टी परित्यागको औचित्य पुष्टि गर्न खोजेका छन् ।  उनले लिङ्देनले नेतृत्व लिइसकेपछिको ४ वर्ष आफ्नो राजनीतिक जीवनको सबैभन्दा दुःखद् भएको बताए । ‘मैले राप्रपालाई सही र एजेण्डा प्राप्तिको बाटोमा लग्न खाजेको थिएन कि? आन्दोलनको नेतृत्व गरेको थिएन कि ? पार्टीलाई सुधारेर राष्ट्रकै पहिलो पार्टी बनाउन खोजेको थिइनँ कि तर ती सबै मेरा प्रयासहरुलाई अगाडि बढ्न दिएनन्,’ उनले भने ।
राणासहितको पार्टी परित्यागलाई लिएर राप्रपा नेताहरुले पार्टी चलाएर देखाउन चुनौती दिएका छन् । राप्रपा प्रवक्ता मोहनकुमार श्रेष्ठले सामाजिक सञ्जालमार्फत राणाको पार्टी परित्याग रहस्यमय भनेका छन् ।
उनले भनेका छन्, ‘सक्रिय राजतन्त्र समयले स्वीकार्दैन, संवैधानिक राजसंस्थाको पक्षधर दल निर्माण गर्ने ध्येय हो भने आजैबाट तपाईंले यो एजेण्डालाई धोका दिइसक्नुभयो । कारणहरू रहस्यमय छन् तथापि समयले यसको अवश्य हिसाब राख्नेछ ।’ श्रेष्ठले राणाले विगत र वर्तमानका कुनै अध्यक्षलाई सहज ढंगबाट काम गर्न नदिएको आरोप पनि लगाएका छन् । ‘विरोध गर्न पो सजिलो हुन्छ, राप्रपा र राजेन्द्र लिङ्देनलाई जे जे आरोप लगाएर पार्टी परित्याग गर्नुभयो, त्यसभन्दा एक इन्च दायाँबायाँ लागेर पार्टी चलाएर देखाउनु, तपाईंलाई चुनौती भो,’ श्रेष्ठले भनेका छन् ।
विभाजन नयाँ होइन 
०४६ सालको प्रजातन्त्र पुनस्थापनापछि स्थापना भएको पूर्वपञ्चायत पक्षधरको पार्टी यसअघि १० पटक विभाजन भइसकेको छ । ०४६ सालमा पार्टी स्थापना गर्दा नै सूर्यबहादुर थापा र लोकेन्द्रबहादुर चन्दमध्ये को अध्यक्ष हुने ? विवाद हुँदा ०४७ जेठ १५ गते  एकै पटक दुईवटा राप्रपा घोषणा भएको थियो । जसअनुसार चन्द नेतृत्वमा  राप्रपा (चन्द) र  थापा नेतृत्वमा राप्रपा (थापा)को घोषणा भयो । दोस्रो विभाजन २०५१ सालमा भएको थियो । गणतन्त्र स्थापनापछि राप्रपा कमल थापा र पशुपति शमशेर राणाबीच विवाद हुँदा विभाजन भएको थियो ।  राप्रपा स्थापनाको ३६ वर्षमा राप्रपा विभिन्न समयमा १० पटक फुटिसकेको छ ।