‘ऊनको स्वीटर’ र ‘भूठान’ समीक्षकको नजरमा उत्कृष्ट

चलचित्र पत्रकार तथा समीक्षकहरूको साझा संस्था चलचित्र समीक्षक समाज (फिक्सन)ले ‘क्रिटिक्स फिल्म अवार्ड २०८२’ को नतिजा सार्वजनिक गरेको छ ।
समाजले मंगलबार विज्ञप्ति जारी गरी २०८२ सालमा प्रदर्शित नेपाली चलचित्रमध्येबाट अवार्डका लागि सहभागी भएका चलचित्रहरूको मूल्यांकनपछि विभिन्न आठ विधाका विजेताको नामावली सार्वजनिक गरेको हो ।
सार्वजनिक नतिजाअनुसार उत्कृष्ट चलचित्र ‘ऊनको स्वीटर’, उत्कृष्ट निर्देशक नवीन चौहान (ऊनको स्वीटर), उत्कृष्ट पटकथा नवीन चौहान र सुरज कटवाल (ऊनको स्वीटर), उकृष्ट अभिनेता हरिवंश आचार्य (भूठान), उत्कृष्ट अभिनेत्री आना शर्मा (रमिताको पिरती), उत्कृष्ट छायाकार सुशन प्रजापति (भूठान), उत्कृष्ट सम्पादन अञ्जय खड्का (भूठान), उत्कृष्ट पाश्र्व संगीत कोबिद बज्र (ऊनको स्वीटर) विजेता घोषणा भएका छन् ।
समाजका अध्यक्ष सामीप्यराज तिमल्सेनाले आगामी असार ६ गते एक कार्यक्रमका बीच विजेतालाई अवार्ड प्रदान गरिने जानकारी दिए । उनले भने, ‘हामीले केही समयदेखि रोकिएको ‘क्रिटिक्स फिल्म अवार्ड’ लाई निरन्तरता दिँदैछौं । सोही कारण यसपटक वर्ष विसं २०८१ र २०८२ को विजेतालाई संयुक्त रूपमा अवार्ड प्रदान गर्दैछौं । हामीले उक्त चलचित्रले प्राप्त गरेको व्यावसायिक सफलताभन्दा पनि समीक्षकका नजरमा उत्कृष्ट भएका काम र नयाँ प्रयोगलाई प्रोत्साहन गर्न अवार्ड प्रदान गर्न लागेका हौं ।’
उनले अवार्डका लागि चलचित्र आह्वान गर्ने र सहभागी भएका चलचित्रलाई समीक्षकले हेरेर दिने नतिजाका आधारमा कार्यसमितिले छलफल गरेर विजेता घोषणा गर्ने गरेको स्पष्ट गरे ।  
अध्यक्ष तिमल्सेनाका अनुसार समाजले सन् २०१४ देखि चलचित्रको गुणात्मक विकास, मौलिकता तथा समीक्षात्मक चेतनाको प्रवर्धन गर्ने उद्देश्यले ‘क्रिटिक्स फिल्म अवार्ड’ प्रदान गर्दै आएको छ । असारको पहिलो सातामा अवार्ड दिइने अध्यक्ष तिमल्सेनाले बताए ।
आफ्नो चलचित्रले चार विधामा पुरस्कार पाएको सार्वजनिक भएपछि सामाजिक सञ्जालमा निर्देशक चौहानले सम्पूर्ण टोलीको साझा मिहिनेतको परिणाम भएको बताउँदै सबैप्रति कृतज्ञता व्यक्त गरेका छन् । उनले निर्माण टोली र दर्शकहरूलाई विशेष धन्यवाद दिएका छन् । सामाजिक सञ्जालमा चौहानले लेखेका छन्, हाम्रो कथालाई आफ्रनो बनाइदिनु भएकामा हृदयदेखि नै धन्यवाद ।