सुरक्षित समाज निर्माणमा मुक्तिनाथ विकास बैंकको सहयोग

काठमाडौं । मुक्तिनाथ विकास बैंकले संस्थागत सामाजिक उत्तरदायित्व (सिएसआर) अन्तर्गत समुदायको सुरक्षा तथा सार्वजनिक सेवा प्रवाहलाई प्रभावकारी बनाउन विभिन्न जिल्लाका प्रहरी कार्यालय तथा ट्राफिक प्रहरी इकाइहरूलाई आवश्यक सामग्री सहयोग गरेको छ । घोराही–दाङस्थित जिल्ला प्रहरी कार्यालय, धादिङ जिल्ला प्रहरी कार्यालय, झापाको काँकरभिट्टा प्रहरी कार्यालय तथा बाँकेको साईगाउँ प्रहरी चौकीलाई कम्प्युटर, फर्निचर तथा कार्यालय सामग्री हस्तान्तरण गरिएको हो ।
बैंकका प्रमुख सूचना अधिकारी तिलबहादुर गुरुङका अनुसार यो सहयोगले प्रशासनिक कार्यसम्पादन, अभिलेख व्यवस्थापन तथा सेवा प्रवाहलाई थप व्यवस्थित र प्रभावकारी बनाउन सहयोग पुग्ने अपेक्षा गरिएको छ । त्यसैगरी, बर्दिया जिल्लाको गुलरिया ट्राफिक प्रहरी कार्यालयलाई रोड डिभाइडर र ट्राफिक सचेतनामूलक बोर्ड समेत सहयोग गरिएको छ । यसले सडक सुरक्षा र ट्राफिक व्यवस्थापनलाई अझ प्रभावकारी बनाउन योगदान पु¥याउने विश्वास रहेको गुरुङले बताए ।
बैंकले स्थानीय आवश्यकता र समुदायको हितलाई केन्द्रमा राखेर यस्ता कार्यक्रम सञ्चालन गर्दै आएको उल्लेख गर्दै सूचना अधिकारी गुरुङले सामाजिक विकास, सुशासन र सार्वजनिक संस्थाहरूको क्षमता अभिवृद्धिमा निरन्तर योगदान दिइँदै आएको बताए । उनका अनुसार मुक्तिनाथ विकास बैंकले आगामी दिनमा पनि समाजको दिगो विकास तथा स्थानीय समुदायको सशक्तीकरणलाई केन्द्रमा राखेर विभिन्न सामाजिक उत्तरदायित्वका कार्यक्रमहरू विस्तार गर्दै जानेछ ।