घुन्सा खोला जलविद्युत निर्माण ठेक्का सवा ५ अर्बमा

काठमाडौं । ताप्लेजुङमा निर्माण हुन लागेको ७७.५ मेगावाटको घुन्सा खोला जलविद्युत् आयोजनाको सिभिल र हाइड्रोमेकानिक वक्र्सको ठेक्का शर्मा–एनभीसीआई एलएलपी–प्रतिमा जेभीले पाएको छ । आयोजनाको प्रवर्धक रेमिट हाइड्रोले संरचना निर्माणका लागि करिब ५ अर्ब २३ करोड रुपैयाँमा  इन्जिनियरिङ, प्रोक्योरमेन्ट एण्ड कन्स्ट्रक्सन (ईपीसी) ठेक्का भारतीय र नेपाली निर्माण कम्पनीको ज्वाइन्ट भेन्चरलाई दिएको हो  ।  
बिडिङ प्रक्रियामा छनोटमा परेको शर्मा–एनभीसीआई एलएलपी–प्रतिमा जेभीलाई ठेक्का सम्झौतामा हस्ताक्षरका लागि सार्वजनिक सूचना जारी गरी आह्वान गरिएको रेमिट हाइड्रोका अध्यक्ष नगेन्द्र ज्ञवालीले बताए । उनका अनुसार आयोजना निर्माणका लागि लट–१ अन्तर्गत सिभिल तथा हाइड्रोमेकानिकल वक्र्सको ठेक्का प्रदान गर्ने आशयपत्र जारी गरी शर्मा–एनभीसीआई एलएलपी–प्रतिमा जेभीलाई सम्झौता गर्न बोलाइएको हो । 
छनोटमा परेको शर्मा एण्ड कम्पनी प्रालि नेपाली कम्पनी हो भने निर्माणवृद्धि कन्स्ट्रक्सन्स इन्डिया एलएलपी र प्रतिमा इन्फ्रास्ट्रक्चर लिमिटेड भारतीय कम्पनी हो । ठेक्का पाउने यी कम्पनीले ईपिसी मोडलमा घुन्सा खोलाको बाँध, सुरुङ, विद्युत्गृहको सिभिल संरचना निर्माण तथा हाइड्रोमेकानिकल उपकरण जडानको काम गर्ने अध्यक्ष ज्ञवालीले बताए । 
रेमिट हाइड्रोका अनुसार प्रतिस्पर्धाबाट  छनोटमा परेको कम्पनीले १ करोड ४४ लाख ६ हजार ४७७.९८  अमेरिकी डलर (५ अर्ब २३ करोड ६ लाख ८८ हजार नेरु)को प्रस्ताव पेस गरेको थियो । मूल्य अभिवृद्धि कर (भ्याट), भन्सार महसुल तथा प्रोभिजनल सम समावेश नगरी गरिएको मूल्यांकनमा उक्त प्रस्ताव सबैभन्दा कम मूल्यको तथा प्राविधिक रूपमा योग्य ठहरिएको कम्पनीले जनाएको छ । घुन्सा खोला जलविद्युत् आयोजनाअन्तर्गत ईपीसी मोडलमा निर्माण गरिने सिभिल तथा हाइड्रोमेकानिकल संरचनाका लागि आह्वान गरिएको अन्तर्राष्ट्रिय प्रतिस्पर्धात्मक बोलपत्र अन्तर्गत ठेक्का टुंगो लागेको हो । बोलपत्र प्रतिस्पर्धामा चीनको साइनोहाइड्रो कर्पोरेशन लिमिटेड र नेपालको कुमार श्रेष्ठ निर्माण सेवा प्रालि सम्मिलित जेभी तथा चीन वाटर एन्ड इलेक्ट्रिक कर्पोरेशन लिमिटेड र नेपालका हाई हिमालय हाइड्रो कन्स्ट्रक्सन प्रालि सम्मिलित जेभी पनि सहभागी भएका थिए ।
ताप्लेजुङ जिल्लाको फक्ताङलुङ गाउँपालिकामा संरचना निर्माण हुने यो आयोजनाका लागि सरकारले भर्खरै वन क्षेत्रको जग्गा उपयोग गर्न स्वीकृति दिइसकेको छ । आयोजना निर्माणका लागि वित्तीय व्यवस्थापन पनि भइसकेको छ । आयोजनामा ५ वटा बैंक तथा वित्तीय संस्थाले १२ अर्ब ७० करोड रुपैयाँ ऋण लगानी गर्ने गरी वित्तीय व्यवस्थापन सम्झौता भइसकेको छ । यो आयोजना निर्माण गर्न ब्याजसहित कुल १८ अर्ब १३ करोड रुपैयाँ लागत अनुमान गरिएको छ । कुल लागतमध्ये आयोजनामा ७० प्रतिशत ऋण र ३० प्रतिशत स्वपुँजी लगानी हुनेछ ।
यो आयोजनामा नेपाल विद्युत् प्राधिकरणले २१ प्रतिशत, एचआईडीसीएलको १५ प्रतिशत र विद्युत् उत्पादन कम्पनी लिमिटेडको १५ प्रतिशत लगानी रहनेछ । बाँकी पुँजीको ४९ प्रतिशत जनतालाई साधारण सेयर जारी गरी व्यवस्थापन गर्ने योजना छ ।
साधारण सेयरतर्फको ४९ प्रतिशतमध्ये २९ प्रतिशत वैदेशिक रोजगारीमा गएका नेपाली नागरिकको, १० प्रतिशत आयोजना प्रभावित स्थानीय बासिन्दाको र बाँकी १० प्रतिशत सर्वसाधारणको लगानी रहनेछ । निर्माण सुरु भएको ४ वर्षभित्र सम्पन्न गर्ने लक्ष्य छ ।
आयोजना निर्माण सम्पन्न भई उत्पादन हुने विद्युत् करिब ३ किलोमिटर दूरीमा राष्ट्रिय प्रासारण ग्रीड कम्पनी लिमिटेड तथा सो क्षेत्रका जलविद्युत् आयोजनाबाट सार्वजनिक निजी साझेदारी मोडेलमा निर्माण गरिने मार्गेनस्थित २२०÷१३२ केभी तमोर सबस्टेशनमा जोडिने छ । यहाँबाट करिब ३२ किलोमिटर लामो २२० केभी डबल सर्किट प्रसारण लाइनमार्फत प्राधिकरणको ढुंगेसाँघु २२० केभी सबस्टेसनमा जोडिने कम्पनीले जनाएको छ ।