भुटानी मूलको परिवारमा त्रासदी : डालसमा गोलीकाण्ड, तीनको मृत्यु

न्युज २४ दैनिक, काठमाण्डौ, २६ साउन । लामो समय नेपालको शरणार्थी शिविरमा बिताएपछि डेढ दशकअघि अमेरिका पुगेका ललित प्रधानले शनिबार बिहान आफ्नै परिवारमा गोली चलाए । टेक्सासको डालसस्थित १९०० ब्लक डडली स्ट्रिटमा भएको यस घटनामा ५३ वर्षीय ललित, उनकी ३७ वर्षीया पत्नी रजनी श्रेष्ठ प्रधान, र तीन वर्षीय छोरा प्रनिश प्रधानको ज्यान गएको छ।

डालस पुलिस विभागका अनुसार, घटना शनिबार बिहान २:१० बजे भएको थियो । प्रहरी घटनास्थलमा पुग्दा रजनी र प्रनिशको घटनास्थलमै मृत्यु भइसकेको थियो । घाइते ललितलाई अस्पताल लगिएको भए पनि उपचारका क्रममा मृत्यु भयो । प्रारम्भिक अनुसन्धान अनुसार, ललितले पत्नी र छोरालाई गोली हानी हत्या गरेपछि आफैंले आत्महत्या गरेका हुन् ।

ललित २००८/०९ मा शरणार्थी पुनर्स्थापना कार्यक्रम अन्तर्गत अमेरिका आएका थिए । उनी अमेरिका आउनु अघिसम्म मोरङको पथरीस्थित भुटानी शरणार्थी शिविरमा बसोबास गर्थे । भुटानी समुदाय स्रोतका अनुसार, ललित लामो समयदेखि डिप्रेशनमा थिए र रजनी उनको दोस्रो पत्नी थिइन्। रजनीको माइती काठमाडौंमा रहेकोले शव नेपाल पठाइदिन माग भइरहेको छ ।

घटनाको एक दिनअघि मात्र ललितले फेसबुकमा लामो स्टाटस लेख्दै मेडिकेड लगायतका सुविधा नपाउँदा भोग्नु परेको कठिनाइबारे उल्लेख गरेका थिए। प्रहरीले घटनाको विस्तृत अनुसन्धान गरिरहेको जनाएको छ ।