‘जिम्मेवार व्यावसायिक अभियानः एनबीआईका दुई दशक’ स्मारिका विमोचन

काठमाडौं । राष्ट्रिय व्यवसायिक पहल (एनबीआई) ले आफ्नो स्थापना कालको २० वर्ष पूरा भएको अवसरमा ‘जिम्मेवार व्यावसायिक अभियानः एनबीआईका दुई दशक’ नामक विशेष स्मारिका विमोचन गरेको छ । ललितपुरस्थित होटल हिमालयमा आयोजित विशेष कार्यक्रममा स्मारिका सार्वजनिक गर्नुका साथै जिम्मेवार व्यावसायिक अभ्यास, सुशासन र दिगो विकासमा निजी क्षेत्रको भूमिकाबारे व्यापक छलफल गरिएको थियो । कार्यक्रममा एनबीआईका अध्यक्ष कुशकुमार जोशीले राष्ट्र निर्माणका लागि अब कूटनीतिभन्दा बढी इमानदारिता आवश्यक रहेको बताए । उनले व्यवसायमैत्री वातावरण निर्माणका लागि सरकार पूर्ण रूपमा नीतिमा आधारित प्रणालीमा अघि बढ्नुपर्ने धारणा राखे । विगतका प्रशासनिक जटिलता र त्रुटिपूर्ण राज्य प्रणालीका कारण व्यवसायीहरूले विभिन्न कठिनाइ भोग्नुपरेको उल्लेख गर्दै उनले नियतवश भएका गल्ती र प्रणालीगत कमजोरीबीच स्पष्ट भिन्नता छुट्याएर मात्र अनुसन्धान प्रक्रिया अघि बढाउन सरकारसँग आग्रह गरे ।
कार्यक्रममा एनबीआईका संस्थापक अध्यक्ष पद्म ज्योतिले संस्थाको २० वर्षे यात्राबारे चर्चा गर्दै द्वन्द्वकालीन समयमा निजी क्षेत्रले शान्ति स्थापना, सामाजिक सद्भाव र दिगो आर्थिक विकासका लागि खेलेको भूमिकालाई स्मरण गरे। व्यवसाय र समाज एकअर्काका परिपूरक रहेको उल्लेख गर्दै उनले जिम्मेवार व्यवसायबिना समृद्ध समाज निर्माण सम्भव नहुने बताए । कार्यक्रमको दोस्रो सत्रमा वक्ताहरूले कानुनी तथा वित्तीय अनुपालन, सामाजिक उत्तरदायित्व, सुशासन तथा वातावरणीय, सामाजिक र संस्थागत सुशासनसम्बन्धी मान्यतालाई दिगो व्यवसायको आधारका रूपमा स्थापित गर्नुपर्नेमा जोड दिए । सार्वजनिक क्षेत्रमा भ्रष्टाचार नियन्त्रण, नातावादमा आधारित आर्थिक प्रवृत्तिको अन्त्य तथा जिम्मेवार व्यावसायिक अभ्यासलाई राष्ट्रिय प्राथमिकताका रूपमा अघि बढाउनुपर्ने धारणा समेत व्यक्त गरिएको थियो ।
कार्यक्रमका प्रमुख अतिथि तथा नेपाल उद्योग वाणिज्य महासंघका अध्यक्ष अन्जन श्रेष्ठले निजी क्षेत्रको विकास र लगानीमैत्री वातावरण निर्माणका लागि महासंघले निरन्तर पहल गरिरहेको उल्लेख गर्दै एनबीआईसँग सहकार्यलाई थप सुदृढ बनाउने प्रतिबद्धता व्यक्त गरे । सो अवसरमा एनबीआईको स्थापना कालदेखि संस्थाको विकासमा योगदान पु¥याएका संस्थापक सदस्य संस्था, संस्थापक सदस्य व्यक्ति तथा विकास साझेदार संस्थाहरूलाई सम्मानपत्रसहित सम्मान गरिएको थियो । समापन समारोहमा एनबीआईका उपाध्यक्ष सुकुन्तलाल हिराचनले जिम्मेवार व्यावसायिक अभ्यास र आन्तरिक सुशासनलाई संस्थागत संस्कारका रूपमा विकास गर्दै आर्थिक समृद्धिको यात्रामा सरकार तथा निजी क्षेत्रबीचको सहकार्यलाई अझ प्रभावकारी बनाउने प्रतिबद्धता व्यक्त गरे ।