मधेस प्रदेश सरकारद्वारा ११ महिनामा ३० अर्ब १७ करोड राजस्व सङ्कलन

काठमाडौं । मधेस प्रदेश सरकारले चालु आर्थिक वर्षको ११ महिनामा ३० अर्ब १७ करोड १४ लाख ७३ हजार राजस्व संकलन गरेको छ । चालु आर्थिक वर्षको साउनदेखि जेठ मसान्तसम्मको अवधिमा यति राजश्व संकलन गरिएको हो । प्रदेश सरकारको अर्थ मन्त्रालयका अनुसार चालु आवको ११ महिनामा आन्तरिक राजस्वतर्फ ४ अर्ब ५९ करोड ३३ लाख ८४ हजार रुपैयाँ संकलन भएको छ । प्रदेश सरकारको आन्तरिक राजस्व संकलनको मुख्य आयस्रोतका रूपमा घरजग्गा रजिस्ट्रेशन र सवारीसाधन कर रहेको छ । यो अवधिमा अवधिमा घरजग्गा रजिस्ट्रेशनबाट एक अर्ब १८ करोड १२ लाख ९५ हजार रुपैयाँ संकलन भएको छ भने सवारीसाधन करबाट दुई अर्ब एक करोड ५० लाख ५० हजार राजस्व संकलन भएको मधेस प्रदेश सरकारका अर्थ मन्त्रालयका सूचना अधिकारी अंशुकुमार झाले जानकारी दिए । उहाँका अनुसार चालु आव २०८२÷८३ मा सवारी चालक अनुमतिपत्र वितरण तथ सवारी दर्ता दस्तुरबाट ६८ करोड ८२ लाख ७० हजार रुपैयाँ, यातायात क्षेत्रको आम्दानीबाट ११ करोड १० लाख ५९ हजार रुपैयाँ, दहत्तर बहत्तरको बिक्रीबाट १० करोड ९ लाख ३५ हजार रुपैयाँ राजस्व संकलन भएको छ । यस्तै, प्रदेश सरकारले बाँडफाँटबाट प्राप्त हुने मूल्य अभिवृद्धि करबापत ७ अर्ब ७५ करोड ६४ लाख ९९ हजार रुपैयाँ, अन्तःशुल्क करबापत  दुई अर्ब ७७ करोड ४१ लाख प्राप्त भएको मन्त्रालयले जनाएको छ । त्यसैगरी, संघीय सरकारबाट प्राप्त हुने समानीकरण अनुदानअन्तर्गत ११ महिनाको अवधिमा ७ अर्ब ६ करोड १६ लाख ७८ हजार रुपैयाँ, सशर्त अनुदान चालुतर्फ दुई अर्ब १७ करोड २७ लाख ७२ हजार रुपैयाँ, सशर्त पुँजीगततर्फ एक अर्ब ५६ करोड ३० लाख ४० हजार रुपैयाँ प्राप्त भएको सूचना अधिकारी झाले बताए । आर्थिक तरलताका कारण घरजग्गा तथा नयाँ सवारीसाधन खरिद बिक्री कारोबारमा आएको कमी, गत भदौ २३ र २४ गते भएको जेनजी आन्दोलनका क्रममा प्रदेश सरकारको राजस्व संकलन गर्ने विभिन्न निकायमा पुगेको क्षतिलगायत कारणले अपेक्षाकृत राजस्व संकलन हुन नसकेको उनको भनाइ छ ।