सेबोन अध्यक्षमा गोपालप्रसाद भट्ट नियुक्त

काठमाडौं । सरकारले नेपाल धितोपत्र बोर्ड (सेबोन) को अध्यक्ष पदमा डा. गोपालप्रसाद भट्ट नियुक्तलाई नियुक्त गरेको छ । शुक्रबार बसेको मन्त्रिपरिषद् बैठकले भट्टलाई बोर्डको नेतृत्व सम्हाल्ने जिम्मेवारी दिने निर्णय गरेको हो । कैलाली स्थायी घर भएका भट्ट नेपाल राष्ट्र बैंकका पूर्व कार्यकारी निर्देशक हुन् । लामो समयदेखि वित्तीय तथा मौद्रिक क्षेत्रसँग आबद्ध रहेका उनी पुँजीबजारसम्बन्धी अध्ययन–अनुसन्धानमा समेत सक्रिय मानिन्छन् । उनले सेयर बजार विषयमै विद्यावारिधि (पीएचडी) गरेका छन् । सेबोनको अध्यक्ष छनोट प्रक्रियाका क्रममा राष्ट्रिय योजना आयोगका उपाध्यक्ष डा. गुणाकर भट्टले सम्भावित स्वार्थ बाझिने अवस्थालाई मध्यनजर गर्दै छनोट समितिबाट अलग हुने निर्णय गरेका थिए । त्यसपछि अध्यक्ष नियुक्तिको प्रक्रिया अघि बढाइएको थियो । यसअघि बोर्डका अध्यक्ष रहेका सन्तोष नारायण श्रेष्ठले पदबाट बाहिरिएपछि उक्त पद रिक्त रहेको थियो। श्रेष्ठ २०८१ मंसिर १० गतेदेखि चार वर्षका लागि अध्यक्ष नियुक्त भए पनि कार्यकाल पूरा नहुँदै पद खाली भएको थियो । नयाँ अध्यक्ष भट्टको नियुक्तिसँगै लामो समयदेखि नेतृत्वविहीन बनेको धितोपत्र बोर्डले अब पुँजीबजार सुधार, नियामकीय सुदृढीकरण तथा लगानीकर्ता हित संरक्षणका कामलाई थप गति दिने अपेक्षा गरिएको छ ।