रास्वपा सभापतिमा रवि र वरिष्ठ नेतामा बालेन निर्विरोध

चितवन । राष्ट्रिय स्वतन्त्र पार्टी (रास्वपा) को चितवनमा सम्पन्न प्रथम ऐतिहासिक राष्ट्रिय महाधिवेशनबाट पार्टीको शीर्ष नेतृत्व सर्वसम्मत रूपमा चयन भएको छ। महाधिवेशनले संस्थापक सभापति रवि लामिछानेलाई पुनः सभापति र प्रधानमन्त्री समेत रहेका बालेन्द्र (बालेन) शाहलाई वरिष्ठ नेतामा निर्विरोध निर्वाचित गरेको छ।

पार्टीको केन्द्रीय निर्वाचन आयोगका अनुसार सभापति पदका लागि लामिछानेको मात्र एकल उम्मेदवारी परेको थियो। लामिछानेको उम्मेदवारीमा वरिष्ठ नेता बालेन शाह आफैँ प्रस्तावक बसेका थिए। प्रतिष्पर्धी कोही नभएपछि निर्वाचन आयोगले लामिछानेलाई निर्विरोध निर्वाचित भएको घोषणा गरेको हो।

त्यस्तै, पार्टी विधानको विशेष व्यवस्था र शीर्ष सहमति अनुसार प्रधानमन्त्री बालेन शाह वरिष्ठ नेता पदमा निर्विरोध चयन भएका हुन्। बालेन शाहको पद सिधै मनोनयन र सर्वसम्मतिका आधारमा तय भएकाले यस पदका लागि निर्वाचनको कुनै कार्यक्रम राख्नु नपरेको निर्वाचन आयोगले जनाएको छ।

शीर्ष दुई पदमा निर्विरोध चयन भएपछि नवनिर्वाचित सभापति रवि लामिछाने र वरिष्ठ नेता बालेन शाहले महाधिवेशन स्थलमा उपस्थित हजारौँ प्रतिनिधि तथा कार्यकर्ताहरूलाई संयुक्त रूपमा हात हल्लाएर अभिवादन स्वीकार गरेका थिए।

नवनिर्वाचित सभापति लामिछानेले महाधिवेशनलाई सम्बोधन गर्दै आफूमाथि थपिएको जिम्मेवारीलाई परिपक्व र जिम्मेवार ढङ्गले निभाउने प्रतिबद्धता व्यक्त गरे। उनले रास्वपा अब देशको भरपर्दो र परिपक्व वैकल्पिक शक्तिका रूपमा स्थापित भइसकेको दाबी समेत गरे।

पार्टीका शीर्ष दुई पदमा सर्वसम्मत नेतृत्व चयन भए पनि खुला उपसभापति, महिला उपसभापति, महामन्त्री र सह-महामन्त्री लगायतका अन्य ६ वटा महत्त्वपूर्ण पदाधिकारी पदका लागि भने महाधिवेशनमा मतदान प्रक्रिया अवलम्बन गरिएको थियो। महाधिवेशनले पदाधिकारीसहित नयाँ केन्द्रीय समितिको समेत चयन गर्दै आफ्नो ऐतिहासिक सत्र सफलतापूर्वक सम्पन्न गरेको छ।