क्यान्सर परीक्षणमा ९० जनामा जोखिम संकेत

काठमाडौं । काठमाडौं महानगरपालिकाले वीर अस्पतालसँगको सहकार्यमा सञ्चालन गरेको निःशुल्क स्तन तथा पाठेघरको मुखको क्यान्सर परीक्षण शिविरमा सहभागी २ हजार ७ सय ७९ महिलामध्ये ९० जनामा एचपीभी (ह्युमन प्यापिलोमा भाइरस) डीएनए परीक्षणको रिपोर्ट पोजेटिभ देखिएको छ । महानगरपालिकाले २०८२ चैत १६ गतेदेखि वैशाख २१ गतेसम्म सञ्चालन गरेको शिविरमा एचपीभी १६ का १२ जना, एचपीभी १८ का १३ जना र अन्य प्रकारका एचपीभी संक्रमण भएका ६५ जना महिला पहिचान भएका हुन् ।
चिकित्सकहरूका अनुसार एचपीभी डीएनए पोजेटिभ हुनु भनेको क्यान्सर भएको भन्ने होइन, तर दीर्घकालसम्म संक्रमण रहिरहेमा पाठेघरको मुखको क्यान्सर हुने जोखिम बढ्ने संकेत हो । एचपीभी १६ र १८ सहित ६, ११, ३१, ३३, ४५, ५२ र ५८ प्रकारका भाइरसले क्यान्सरको जोखिम बढाउन सक्छन् । यसअघि नेपालमा एचपीभी १६ र १८ को मात्र परीक्षण हुँदै आएकोमा यस वर्ष महानगरपालिकाले अन्य प्रकारका एचपीभीको समेत परीक्षण गरेको हो ।
३५ दिनसम्म सञ्चालन गरिएको शिविरमा ३ हजार ४ सय ९४ महिलाले नाम दर्ता गरी रिफरल स्लिप लिएका थिए । तीमध्ये २ हजार ९ सय ७५ जना परीक्षणका लागि अस्पताल पुगेका थिए । कार्यक्रमका फोकल पर्सन चन्द्रा भट्टका अनुसार २ हजार ७ सय ७९ जनाको एचपीभी परीक्षणसँगै २ हजार ९ सय ६१ जनाको स्तन क्यान्सर परीक्षण गरिएको थियो । तीमध्ये ४ सय ११ जनाको मेमोग्राम र ४ सय ९४ जनाको स्तनको भिडियो एक्स–रे गरिएको थियो । चार जनालाई स्तनको बायोप्सी आवश्यक देखिएकोमा एक जना सम्पर्कमा नआएको जनाइएको छ । बायोप्सी गरिएकामध्ये दुई जनामा स्तन क्यान्सर पुष्टि भएपछि उनीहरू उपचाररत छन् । एक जनामा स्तनमा मासु पलाएको अवस्था देखिएको थियो ।
पाठेघरको मुखको परीक्षणका क्रममा ११ जनामा सर्भाइकल इन्ट्राएपिथेलियल नियोप्लासिया (सीआईएन) देखिएको छ । यसलाई पाठेघरको मुखको क्यान्सरको प्रारम्भिक अवस्था मानिन्छ । तीमध्ये चार जनामा उच्च जोखिम र सात जनामा कम जोखिमको संकेत देखिएको भट्टले जानकारी दिइन् । साथै दुई जनाको पाठेघरको मुखमा पलाएको मासु शल्यक्रियामार्फत हटाइएको थियो । परीक्षणका क्रममा आङ खसेका तथा पाठेघरको मुखमा संक्रमण देखिएका महिलाको समेत उपचार गरिएको महानगरपालिकाले जनाएको छ ।
वडागत विवरणअनुसार वडा नम्बर २, १२, १७, १८, २० र २१ का परीक्षण गराएका महिलामा एचपीभी संक्रमण पुष्टि भएको छैन । सबैभन्दा बढी वडा नम्बर २२ का ११ जनामा एचपीभी पोजेटिभ देखिएको छ । त्यसपछि वडा नम्बर १६ का ९ जना, वडा नम्बर १४ र १५ का समान ७–७ जना तथा वडा नम्बर ७ का ६ जनामा संक्रमण पुष्टि भएको छ ।
चिकित्सकहरूले ३० देखि ६० वर्ष उमेर समूहका महिलाले प्रत्येक पाँच वर्षमा एकपटक पाठेघरको मुखको क्यान्सर परीक्षण गराउनुपर्ने सुझाव दिएका छन् । एचपीभी संक्रमण पाँचदेखि १० वर्षसम्म रहिरहेमा क्यान्सरको जोखिम बढ्ने भएकाले समयमै परीक्षण र आवश्यक उपचारले जटिल अवस्था आउन नदिने उनीहरूको भनाइ छ । साथै स्तनमा गाँठो देखिनु, आकार परिवर्तन हुनु, निप्पल भित्र धसिनु वा असामान्य तरल पदार्थ बग्नुजस्ता लक्षण देखिएमा तत्काल स्वास्थ्य परीक्षण गराउन चिकित्सकहरूले आग्रह गरेका छन् ।